ލާމަރުކަޒީ ގާނޫނަށް ބަދަލު ގެނެވޭއިރު ލޯކަލް ގަވަމެންޓު އޮތޯރިޓީ (އެލްޖީއޭ)ގެ ރޯލު ބަދަލު ކުރަން ޖެހޭކަމަށް މަޑަވެލީ ދާއިރާގެ މެމްބަރު ހުސެއިން ފިރުޝާން ވިދާޅުވެއްޖެއެވެ.
"ރައްޔިތުންގެ ބާރު، ލާމަރުކަޒީ ނިޒާމު" ނަމުގައި ސ. ގަމުގެ އީކުއޭޓަރ ވިލެޖުގައި މިހާރު ކުރިއަށްދާ ސިމްޕޯޒިއަމްގައި ވާހަކަފުޅު ދައްކަވަމުން ފިރުޝާން ވިދާޅުވީ އެލް.ޖީ.އޭ މިހާރު އެެކުލެވިފައިވާ ގޮތް ބަދަލުވާން ޖެހޭ ކަމަށެވެ. އެގޮތުން މިހާރު އޮތް އެލްޖީއޭ ލޯކަލް ގަވަމަންޓް އެސޯސިއޭޝަންއަކަށް ބަދަލުވާން ޖެހޭ ކަމަށެވެ.
ފިރުޝާން ވިދާޅުވީ، ކައުންސިލަރުން ވަކި ކުރުމާއި ފިޔަވަޅު އެޅުންފަދަ ކަންކަން އެލްޖީއޭގެ ބޯޑުގައި އައްޔަން ކޮށްފައި ތިބޭ މެމްބަރުންތަކަށް ކުރެވޭ ގޮތަށް އޮތުމުގެ ބަދަލުގައި އެފަދަ ކަންކަން ނިންމުމުގެ ބާރު ރައްޔިތުންގެ މަޖީލީހަށް ދޭން ޖެހޭ ކަމަށެވެ.
ފިރުޝާން ވިދާޅުވީ ރަށު ކައުންސިލްތައް މޮނިޓަރ ކުރުމާއި، ދުވަހުން ދުވަހަށް ކުރެވޭ ކަންކަން މޮނިޓަރ ކުރުމުގެ ބާރު މިހާރުވެސް އޮނަނަ ގޮތަށް އަތޮޅު ކައުންސިލަށްދީ އަތޮޅު ކައުންސިލުގެ ދައުރު ފުޅާކުރުން އެއީ މުހިންމު ކަމެއް ކަމަށެވެ.
ފިރުޝާން އިތުރަށް ވިދާޅުވީ އަތޮޅު އިޙްތިސާސް ކަނޑައެޅެން ޖެހޭ ކަމަށާއި، ރަށު ކައުންސިލްގެ އިޙްތިސާސްގައި ނުހިމެނޭ އަތޮޅުގައި ހުންނަ އެންމެހައި ވަސީލަތްތަކަކީ (ފަޅުތަކާއި، ފަޅުރަށްތަކާއި، ރިސޯޓްތައް ކަމުގައިވީނަމަވެސް) އަތޮޅު ކައުންސިލްގެ އިޙްތިސާސް ކަމަށް ކަނޑެއެޅެން ޖެހޭ ކަމަށެވެ. އެ ތަންތަނުގެ މާލީ މަންފާ އަތޮޅަށް ލިބެންޖެހޭ ކަމަށެވެ.
ލާމަރުކަޒީ ގާނޫނަށް ބަދަލު ގެނެވޭއިރު އެލްޖީއޭގެ ދައުރު ހަރުދަނާ ކުރުމަކީ އެންމެ ހާއްސަ އިސްކަމެއްދޭން ޖެހޭ އެއްކަން ކަމަށެވެ. އެގޮތުން އެލްޖީއޭގެ ދައުރު ހަރުދަނާ ނުކުރެވިއްޖެނަމަ އޭގެ ގެއްލުން ދެން އަންނަން އޮތް ކައުންސިލްތަކަށް އައުމުގެ ފުރުސަތު ބޮޑުކަމަށެވެ. މަޖްލިސް މެޖޯރިިޓީ އާއި ހެޔޮ ވެރިކަމުގެ އުސޫލުގެ ތެރެއިން މިކަންކަމަށް ހާއްސަ އިސްކަމެއް ދިނުމަކީ މުހިއްމު ކަމެއްކަމަށް ފިރުޝާން ފާހަގަ ކުރެއްވިއެވެ.