ދައުލަތުގެ ބަޖެޓުން މަދުވެގެން ފަސް ޕަސެންޓު ކައުންސިލް ތަކަށް ދޫކޮށްލައްވާނެކަމަށް ރައީސް އިބްރާހިމް މުހައްމަދު ސޯލިހު ވިދާޅުވި ވާހަކަތަކަށް ދެކުނު ކައުންސިލަރުން ފާޑު ވިދާޅުވެއްޖެއެވެ.
ޓްރާންސްޕޭރެންސީ މޯލްޑިވްސްއިން އިންތިޒާމްކޮށްގެން ސ. ގަމުގެ އީކުއޭޓަރ ވިލެޖުގައި ކުރިއަށްގެންދިޔަ "ރައްޔިތުންގެ ބާރު، ލާމަރުކަޒީ ނިޒާމު" 2 ދުވަހުގެ ސިމްޕޯޒިއަމްގައި ބައިބެރިވި ގިނަ ކައުންސިލަރުން ވަނީ ރައީސް އިބްރާހިމް މުހައްމަދު ސޯލިހު ބަޖެޓުގެ ފަސް ޕަސެންޓް ކައުންސިލްތަކަށް ދެއްވާނެކަމަށް ވިދާޅުވި ވާހަކަތަކާއި މެދު ގިނަ ސުވާލު އުފައްދަވާފައެވެ.
ލ، ގއ. ގދ. ޏ އަދި އައްޑޫގެ ކައުންސިލަރުން ބައިވެރިވި މި ސިމްޕޯޒިއަމްގައި ގިނަ ކައުންސިލަރުންގެ ޝަކުވާ އަކީ ލާމަރުކަޒީ ގާނޫނުން މިހާރުވެސް ކައުންސިލްތަކަށް ލިބިފައިވާ ބާރު މައި ސަރުކާރުން ހިފަހައްޓާފައިވުމެވެ. އެގޮތުން މިނިސްޓްރީތަކުން ބަޖެޓު ހިފަހައްޓާފައި އޮތް އޮތުން ކައުންސިލަރުން ވަނީ ފާހަގަކޮށްފައެވެ.
އައްޑޫގެ މޭޔަރ އަބްދުﷲ ސޯދިގު (ސޯބެ) ވިދާޅުވީ އައްޑޫގައި ގަހެއް އިންދަން ޖެހުނަސް ފުރަތަމަ ޖެހެނީ މައި ސަރުކާރުން އެކަމުގެ ހުއްދަ ހޯދުމަށްކަމަށެވެ.
"އައްޑޫ ސިޓީގައި ގަހެއް އިންދަން ބޭނުންވުމުން ފުރަތަމަ މައި ސަރުކާރުގެ ހުއްދައެއް ހޯދަން ޖެހުމަކީ އެއީ ކައުންސިލްތައް ބާރުވެރިކުރުން ނޫން. އައްޑޫގެ ރައްޔިތަކު ދަނޑުގައި މިރުސް ގަހެއް އިންދާ ވިއްކަން މަސައްކަތް ކުރާ ހިސާބުން އެ ދަނޑަށް ދީފައިވާ ކަރަންޓުގެ އަގު ބޮޑުވުމުން ކައުންސިލަށް ގުޅާ ޝަކުވާކުރަމުން އަޔަސް އެކަމަށްވެސް ކުރާނެ ކަމެއް ކައުންސިލްގަ ނެތް،
" އެމްޑީޕީގެ ފުލް މެޖޯރިޓީ އޮތް އައްޑޫ ސިޓީ ކައުންސިލްގެ މޭޔަރ ސޯބެ ވިދާޅުވިއެވެ.
ފުވައްމުލަކު ޑެޕިއުޓީ މޭޔަރ މުހައްމަދު ޟިރާރު ވިދާޅުވީ ކައުންސިލްތަކަށް ބަޖެޓުގެ ފަސް ޕަސެންޓު ދޭއިރު ބާކީ 95 ޕަސެންޓަށް ވާ ގޮތްވެސް އެނގެން ޖެހޭކަމަށެވެ. އަދި ހަގީގީ މާނާގައި މި ހާރު އޮތް ގާނޫނު ހިންގިއަސް ކައުންސިލްތަކުން ރައްޔިތުންނަށް ހަގީގީ މާނާގައި ހިދްމަތް ފޯރުކޮށްދެވޭނެކަމަށެވެ.
ލ. އަތޮޅު ކައުންސިލްގެ ރައީސް އަބްދުﷲ ޝަރީފުވެސް ވަނީ ކައުންސިލް ތަކަށް ހައްގު މިންވަރަކީ ބަޖެޓުގެ އެންމެ 5 ޕަސެންޓުތޯ ސުވާލު އުފައްދަވާފައެވެ.
ރައްޔިތުންގެ މަޖިލީހުގެ މަޑަވެލީ ދާއިރާގެ މެމްބަރު ހުސެއިން ފިރުޝާން އާއި ރައީސް އޮފީހުގެ ޕޮލިސީ ސެކްޝަންގެ ބޭފުޅުންގެ އިތުރުން ފިނެންސް މިނިސްޓްރީގެ ސްޓޭޓް މިނިސްޓަރ އަދި ޕްލޭނިން މިނިސްޓްރީގެ އިސް ބޭފުޅުން ބައިވެރިވި މި ސިމްޕޯޒިއަމްގައި ދެކުނުގެ ހަތަރު އަތޮޅުގެ ކައުންސިލަރުން ވަނީ މިހާތަނަށް އެކައުންސިލްތަކަށް ދިމާވި މައްސަލަތައް ހިއްސާ ކުރައްވާފައެވެ.
މީގެ އިތުރުން ލޯކަލް ގަވަމެންޓު އޮތޯރިޓީގެ ދައުރާއި، އެ އޮތޯރިޓީން މިހާތަނަށް ކައުންސިލްތަކަށަް ޖެއްސި ހާލުގެ ވާހަކަތައް ކައުންސިލަރުން ވަނީ ހިއްސާކޮށްފައެވެ.
ލ. އަތޮޅު ކައުންސިލްގެ ރައީސް ޝަރީފު ވިދާޅުވީ މިހާރު ކައުންސިލްތައް ފެންނަނީ ޔާމީންގެ ވެރިކަމުގައި ޝީލްޑު ހިފައިގެން މަގު މައްޗަށް ނިކުތް އެސްއޯ ފުލުހުން ގޮތަށް ކަމަށެވެ.
"މިދިޔަ ސަރުކާރުގައި ޝީލްޑު ހިފައިގެން ރައްޔިތުންނާއި ކުރިމަތި ލުމަށް ނިކުތް އެސްއޯ ފުލުހުން ގޮތަށް މިއަދު ކައުންސިލްތައް މިވަނީ، ސަރުކާރުން ކޮށްދޭން ގާނޫނު ލާޒިމް ކުރާކަންކަން ނުކުރެވުމުން ރައްޔިތުން މިއަންނަނީ ކައުންސިލަށް، ކައުންސިލްތަކަށް މި ބަވަނީ، މީގަ ބަލަން ޖެހެނީ ކޮންފަރާތަކުންތޯ އެސްއޯ ފުލުހުންނަށް ކޮމާންޑު އަންނަނީ، އެކޮމާންޑު އަންނަނ ތަން ބަލައި އެދިމާލުން އެކަން ހުއްޓުވަން ޖެހެނީ، މިއަދު ކައުންސިލްތަކަށްވެސް މިއޮތީ އެ ހާލު"
ޝަރީފު ވިދާޅުވިއެވެ.
ބައެއް މެމްބަރުން ވަނީ މަޖްލިސްގެ ސުޕަ މެޖޯރިޓީ އޮވެ ކައުންސިލްތައް ބާރު ނުކުރެވޭތީ ދެން ރައްޔިތުންނަށް ދައްކާނީ ކޮން ބަހަނާއެއްތޯ ސުވާލު އުފައްދަވާފައެވެ.
އެމްޑީޕީން މިދިޔަ ހަފްތާ ބަންދު ތެރޭގައިވަނީ އެޕާޓީގެ ކައުންސިލަރުންގެ ކޮންފަރެންސެއް ބާއްވާފައެވެ. އެ ކޮންފަރެންސް ހުޅުއްވައި ދެއްވަމުން ރައީސް އިބްރާހިމް މުހައްމަދު ސޯލިހު ވިދާޅުވީ ފުރިހަމަ ލާމަރުކަޒީ ނިޒާމެއް ގެނައުމަކީ، އެމަނިކުފާނުގެ އެންމެ މުހިންމު އެއް ވައުދުފުޅު ކަމަށާއި، ކުރީ ސަރުކާރުން މިނިސްޓްރީތަކަށް ނަގާފައި ހުރި، ލޯކަލް ކައުންސިލްތަކުގެ ބާރުތައް އެ ކައުންސިލްތަކަށް އަނބުރާ ދެއްވަން ފަށްޓަވާފައިވާ ކަމަށެވެ.
އަދި ލާމަރުކަޒީ ގާނޫނަށް ގެންނަންޖެހޭ އިސްލާހުތައް ރައްޔިތުންގެ މަޖިލިހަށް ހުށަހަޅުއްވައިފައިވާ ކަމަށް ރައީސް ސޯލިހުވަނީ ވިދާޅުވެފައެވެ.
ޓްރާންސްޕޭރެންސީއިން އިންތިޒާމް ކުރި މި ސިމްޕޯޒިއަމްގައި ބައިވެެރިން ހުށަހެޅި ހިޔާލުތައް ރައްޔިތުންގެ މަޖިލީހަށް މިހާރު ހުށަހެޅިފައިވާ އިސްލާހުގެ ހަރުދަނާ ކުރުމުގައި ބޭނުން ކުރުމަށް ވަނީ ނިންމާފައެވެ.