އަންނަ މަހު އައްޑޫގައި ބޭއްވުމަށް ތައްޔާރުވަމުން އަންނަ އިންޓަނޭޝަނަލް ޓީޗާސް ކޮންފަރެންސް އަށް ތައްޔާރުވުމުގެ ގޮތުން ހިތަދޫ ސްކޫލުން އިސް ނަގައިގެން އައްޑޫގެ ތިން ސަރަހައްދެއް މިއަދު ސާފުކޮށްފިއެވެ.
ހިތަދޫ ސްކޫލުގެ ޕްރިންސިޕަލް ޑރ. އާސިޔަތު މުހައްމަދު ދީދީ ވިދާޅުވީ ޓީޗާސް ކޮންފަރެންސް އަކީ ގިނަ އަދަދެއްގެ ބޭރުގެ މެހުމާނުން އައްޑޫއަށް ޒިޔާރަތް ކުރާނެ ހަރަކާތަކަށް ވުމާއި އެކު އެފަރާތްތަކަށް މަރުހަބާ ދަންނަވާ އިރު އައްޑޫ އަކީ ސާފު ރީތި ތަނެއްގެ ގޮތުގައި ބާއްވަން ޖެހޭ ކަމަށެވެ.
އެގޮތުން މިއަދު ހަވީރު 4 އިން އިރުެ އޮއްސި 6 ޖެހުމާއި ހަމައަށް ވަނީ ހިތަދޫ ބަނދަރުގެ ފަތާ ޓްރެކް ސަރަހައްދާއި، ހަންކެޑެ ޕިކްނިކް ސަރަހައްދުގެ އިތުރުން ނޫރާނީ ސްކޫލް ކުރިމަތިން ގާޑިއާ ހުރި ސަރަހައްދު ސާފުކޮށްފައެވެ.
މިއަދުގެ ސާފު ކުރުމުގެ ހަރަކާތުގައި ޓީޗަރުންނާއި މުވައްޒަފުން، ދަރިވަރުން އަދި ސްކޫލް ކެޑޭޓު، ބޭންޑު އަދި ގައިޑު އަދި ސްކައުންޓުން ވަނީ ބައިވެރިވެފައެވެ. އަދި ކުނި އުކާލުމުގައި ވެމްކޯގެ މުވައްޒަފުންގެ އެހީތެރިކަން ވަނީ ހިތަދޫ ސްކޫލަށް ލިބިފައެވެ.
ޑރ. އާސިޔަތު ވިދާޅުވީ މިއަދުގެ ހަރަކާތަށް ލިބުނު ތަރްހީބާއި އެކު މީގެ އިތުރު ހަރަކާތެއް ބޭއްވުމަށް ސްކޫލުން މަސައްކަތް ކުރަމުން އަންނަ ކަމަށެވެ. އަދި މިއަދުގެ ހަރަކާތަށް ދެއްވި އެއްބާރުލުމަށް ސްކޫލްގެ މެނޭޖްމަންޓުގެ ނަމުގައި ހުރިހާ ފަރާތްތަކަށް ޝުކުރު ދެންނެވިއެވެ.