ޕީޕީއެމް ބަލިކަށި ނުވާނެކަމަށް އެޕާޓީގެ މުސްތަޝާރު ކުރީގެ ރައީސް އަބްދުﷲ ޔާމީން އަބްދުލް ގައްޔޫމް ވިދާޅުވެއްޖެއެވެ.
ރައީސް ޔާމީން މިގޮތަށް ވިދާޅުވީ ޕީޕީއެމް ކޯލިޝަންގެ އިސް ބައެއް ބޭފުޅުން ޕާޓީ ދޫކޮށް ޖުމްހުރީ ޕާޓީއާއި ގުޅިވަޑައިގަންނާކަމަށް ސޯޝަލް މީޑިއާގައި ދެެކެވޭ ވާހަކަ ތަކާއި ގުޅިގެން ޕީޕީއެމް ސަޕޯޓަރުން ހިމެނޭ ވައިބަ ގްރޫޕަކަށް ކުރެއްވި މެސެޖެއްގައެވެ.
ޕީޕީއެމްގެ ބައެއް ސަޕޯޓަރުން އެކަމުގެ ކަންބޮޑުވުން ފާޅު ކުރެއްވުމުން ރައީސް ޔާމީން ވިދާޅުވީ " އިންޝާﷲ، ޕީޕީއެމް ބަލިކަށްޓެއް ނުވާނެ" ކަމަށެވެ.
ޕީޕީއެމް އަދި ޕީއެންސީއިން ވަނީ ރައީސް ޔާމީނާއި އަރިން ކުރީގެ ބައެެއް މަޖްލިސް މެމްބަރުން ވަކިވެވަޑައިގެންފައެވެ. އެގޮތުން މިއަދު އިސްތިއުފާ ދެއްވި ބޭފުޅުންގެ ތެރޭގައި ޕީއެންސީގެ ނައިބު ރައީސް އަދި މިދިޔަ ރައްޔިތުންގެ މަޖިލީހުގެ ޕީޖީ ލީޑަރ އަޙްމަދު ނިހާން ޙުސެއިން މަނިކު އާއި ޕީޕީއެމްގެ ތަރުޖަމާނު އަދި ކުރީގެ ކެލާ ދާއިރާގެ މެމްބަރު ޢަލީ ޢާރިފް އިތުރުން ޕީޕީއެމްގެ ކުރީގެ ސެކެޓްރީ ޖެނެރަލް އަދި ނިލަންދޫ ދާއިރާގެ ކުރީގެ މެމްބަރު ޑރ. ޢަބްދުﷲ ޚަލީލު އާއި އިނގުރައިދޫ ދާއިރާގެ ކުރީގެ މެމްބަރު އިބްރާހީމް ފަލާޙް ހިމެނެއެވެ. އަދި
މީގެ އިތުރުން ރައީސް ޔާމީންގެ ކުރީގެ ނައިބު ރައީސް ޢަބްދުﷲ ޖިހާދާއި މިދިޔަ ސަރުކާރުގެ ހޯމް މިނިސްޓަރ އަޒްލީން އަޙްމަދު ވެސް ޕީޕީއެމް ކޯލިޝަން ދޫކޮށް މިރޭ ސަރުކާރު ކޯލިޝަންގެ ތެރޭގައި ހިމެނޭ ޖުމްހުރީ ޕާޓީ އާއި ގުޅުމަށް ހަމަޖެހިފައިވާ ކަމުގެ އަޑުތައް ވަނީ ފެތުރިފައެވެ.