ޖުމްހުރީ ޕާޓީ އާއި ގުޅުނީ އެއްވެސް މަގާމެއް ބޭނުންވެގެން ނޫން ކަމަށާއި، ބޭނުމަކީ ޖުމްހުރީ ޕާޓީ އެހެން ހަރުފަތަކަށް ގެން ގޮސް ދިނުން ކަމަށް ރޭ އެޕާޓީ އާއި ގުޅުނު ޕީއެންސީގެ ނައިބް ރައީސް އަހުމަދު ނިހާން ހުސެއިން މަނިކު ވިދާޅުވެއްޖެއެވެ.
ރޭ ޖުމްހުރީ ޕާޓީގެ މައި ޖަގަހަ ކުނޫޒުގައި ބޭއްވި ސޮއި ކުރުމުގެ ރަސްމިއްޔާތަށް ފަހު ވާހަކަ ދައްކަވަމުން ނިހާން ވިދާޅުވީ ފާއިތުވި 15 އަހަރު ރާއްޖޭގެ ސިޔާސީ ދާއިރާގެ އެކި ހަރޔުފަތް ތަކުގައި މަސައްކަތް ކޮށް ތަޖްރިބާތަކެއް ލިބިފައިވާ ކަމަށެވެ.
ނިހާނު ވިދާޅުވީ ޖުމްހުރީ ޕާޓީ އާއި ގުޅުނީ އެޕާޓީ ތެރެއިން އެއްވެސް މަގާމެއް ބޭނުން ވެގެން ނޫންކަމަށެވެ. އަދި ބޭނުންވަނީ ގާސިމް އާއި އެކު މަސައްކަތްކޮށް ޖުމްހުރީ ޕާޓީ ވަރުގަދަ ކުރުން ކަމަށެވެ.
ޖުމްހުރީ ޕާޓީ އަކީ 2008 އަދި 2013 އަދި 2018 ވަނަ އަހަރުގެ ރިޔާސީ އިންތިހާބު ކާމިޔާބު ކުރުމުގައި އިސް ރޯލު ކުޅުނު ޕާޓީއެއް ކަމަށާއި، ގާސިމްގެ މެދު މިނިގެ ސިޔާސަތަކީ ރާއްޖެ ހަމަމަގަށް އެޅުވުމަށް ކޮންމެ ފަހަރަކުވެސް ބޭނުން ކުރަންޖެހޭ ވިސްނުންކަމަށް ނިހާނު ވިދާޅުވިއެވެ.
ގާސިމްގެ ރިސޯޓުތަކަކީ ގަވާއިދާއި ހިލާފަށް ނަގާފައިވާ ރަށްތަކެއް ކަމަށް ބުނެ ގާސިމަށް ވަރަށް ބޮޑަށް ޕީޕީއެމްގެ ސިޔާސީ ޕޯޑިއަމް ތަކުގައި ފާޑުވިދާޅުވި ނިހާނު ރޭ ވަނީ ގާސިމަށް އެތައް ތައުރީފަކާއި ޝުކުރެއް ދަންނަވާފައެވެ.
ނިހާން އިއްޔެ ވަނީ ޖުމްހުރީ ޕާޓީ އާއި ގުޅުމަށް ޕީއެންސީން ވަކިވެވަޑައިގެންފައެވެ.