އައްޑޫގެ ސީ އެމްބިއުލެންސް ހަލާކުވެގެން މާލެ ގެންދިޔަ ފަހުން އެއް މަސް ދުވަސް ވެފައިވާ އިރު އާ ސީއެމްބިއުލެންސެއް ނުލިބޭތީ ރައްޔިތުން ކަންބޮޑުވުން ފާޅު ކުރަން ފަށައިފިއެވެ.
ހުޅުމީދޫ އާއި ހިތަދޫ ރީޖަނަލް ހޮސްޕިޓަލާއި ދެމެދު ބަލި މީހުން އުފުލުމަށް ބޭނުން ކުރާ ސީ އެމްބިއުލެންސް ދުއްވައި ބަލަހައްޓަނީ އެމްއެންޑީއެފް ސަދަން އޭރިއާއިންނެވެ. މައުލޫމާތު ލިބިފައިވާ ގޮތުގައި ސީ އެމްބިއުލެންސް ވަނީ މަރާމާތު ނުކުރެވޭވަރަށް ހަލާކުވެފައެވެ.
ހުޅުދޫން ވާހަކަ ދެއްކި މީހަކު ބުނީ އިމަޖެންސީ ކަމެއް ދިމާވެގެން މީހަކު މިހާރު ހުޅުމީދޫން ހިތަދޫއަށް ގެންދިއުމަކީ ވަރަށް ދަތިކަމެކެވެ. އަދި މިކަމަކީ އެއްވެސް ބަޔަކު އިސްކަމެއް ދީގެން ހައްލު ކުރަން އުޅޭ ކަމެއް ކަމަށް ނުފެނެއެވެ.
"އައްޑޫލައިވް" އަށް އެނގިފައިވާ ގޮތުގައި ސީ އެމްބިއުލެންސް ހަލާކުވެގެން މަރާމާތަށް މާލެ ގެންދިޔަކަން ރަސްމީކޮށް އައްޑޫގެ އެއްވެސް ސިއްހީ މުވައްސަސާއަކަށް އަންގާފައި ނުވެއެވެ. ހިތަދޫ ރީޖަނަލް ހޮސްޕިޓަލަށްވެސް ސީ އެމްބިއުލެންސް ނެތްކަން އެނގުނީ ހިތަދޫ ރީޖަނަލް ހޮސްޕިޓަލްގައި އޮތް ބަލި މީހަކު ފަރުވާ ދިނުމަށް ފަހު ފަރުވާ އިތުރަށް ކުރިއަށް ގެންދިއުމަށް ސ. ހުޅުމީދޫ ސިއްހީ މަރުކަޒަށް ބަދަލު ކުރުމަށް ސީ އެމްބިއުލެންސް ހަމަޖެއްސުމަށް ގުޅުމުންނެވެ.
ސަރުކާރުން ވަރަށް ބޮޑަށް އަޅާލުން ދޫކޮށްލާފައިވާ އައްޑޫ ސިޓީގެ ސިއްހީ ހާލަތު އެއް ދުވަހުން އަނެއް ދުވަހަށް ދަށައް ދަމުން އަންނަ އިރު މިކަންކަމަށް އެއްވެސް އިސްކެމެއް ދެވިގެންދާ ތަނެެއް ނުފެނެއެވެ.