ދުނިޔޭގެ ބައެއް ގައުމުތަކުގައި އަމަލުކުރާ ގޮތަށް ސިއްހީ ބައެއް ފަރުވާތަކަށް ރާއްޖޭގައި ކެނެބިސް ނުވަތަ މަރިޖުއާނާ ހުއްދަ ކުރުމަށް ކާށިދޫ ދާއިރާގެ މެމްބަރު އަބްދުﷲ ޖާބިރު ގޮވާލައިފިއެވެ.
މިއަދު ހޯމް މިނިސްޓަރ ޝެއިޚް އިމްރާން އަބްދުﷲ މަޖިލީހަށް ހާޒިރުކުރުމަށް ފަހު މެމްބަރުންނަށް މިނިސްޓަރާއި ސުވާލުކުރުމަށް ދެއްވި ފުރުސަތުގައި ޖާބިރު ވަނީ ރާއްޖޭގައި "މެޑިކަލް މަރިޖުއާނާ" ހުއްދަ ނުކުރެވިގެން އުޅެނީ ކީއްވެތޯ ސުވާލުކޮށްފައެވެ.
ޖަވާބު ދެއްވަމުން މިނިސްޓަރ އިމްރާން ވިދާޅުވީ އިސްލާމް ދީނުގައި ހަރާމް ކުރައްވާފައިވާ އެއްޗެއް ހުއްދަކުރުމަށް ފުރުސަތެއް ނުދެވޭނެ ކަމަށެވެ. އަދި ރާއްޖޭގައި ބޭހެއް ވިޔަސް ނުވަތަ އެނޫން އެއްޗެއް ވިޔަސް ހުއްދަ ނޫން އެއްޗެއް ހުއްދަ ކަމުގައި ކަނޑައެޅުމުގެ ބާރު އޮތީ ރައްޔިތުންގެ މަޖިލީހަށް ކަން ފާހަގަކުރައްވާފައެވެ.
ކެނެޑާ ފަދަ ގައުމުތަކުގައި ޑޮކްޓަރުގެ ލަފަޔާއެކު ކެނަބިސް ބޭނުން ކުރުން ހުއްދައެވެ. ނަމަވެސް އެމެރިކާގައި އަދިވެސް ކެނެބިސް ޓްރެފިކް ކުރުމާއި ބޭނުން ކުރުމަކީ ބޮޑު ކުށެކެވެ.