ހދ.ހަނިމާދޫ އަށް ދަތުރުކުރަނިކޮށް އިއްޔެ މެންދުރު ބަންޑުން ޖަހާލި ލޯންޗުން ސަލާމަތްވި ތިން މީހުން ފަރުވާއަށް ހަނިމާދޫ ސިއްހީ މަރުކަޒުން ދޫކޮށްލައިފިއެވެ.
10 މީހުންނާއި އެކު ހދ. ނޮޅިވަރަންފަރުން ހދ. ހަނިމާދޫއަށް ދަތުރު ކުރި ލޯންޗު ބަންޑުން ޖަހާލި ހާދިސާގައި ފަސް މީހަކު ވަނީ މަރުވެފައެވެ. އަދި ފަސް މީހަކު ސަލާމަތްވެ އެ ފަސް މީހުން ވަނީ ފަރުވާ ދިނުމަށް ހަނިމާދޫ ސިއްހީ މަރުކަޒަށް ގެންދެވިފައެވެ. ސަލާމަތުވި މީހުންގެ ތެރެއިން ލޯންޗުގެ ކެޕްޓަން ޖަޒުލާން އަދުނާން އާއި ލޯންޗުގެ ފަޅުވެރިޔާ ރޭވަނީ ފަރުވާއަށް ފަހު ދޫކޮށްލާފައެެވެ.
މިއަދު އިތުރު ފަރުވާއަށް ފަހު ދޫކޮށްލާފައިވަނީ ނޮޅިވަރަންފަރު ވީނަސްގޭ އަބްދުއްޝުކޫރު، 57، އާއި އެ ރަށު ރެޑް ރޯސް އައިމިނަތު އާސިމާ، 29، އަދި ދ. ކުޑަހުވަދޫ ފޮގެޓްމީ ނޮޓް އައިޝަތު ޝެހެނާޒް، 29، އެވެ.
އިއްޔެގެ ހާދިސާގައި އަބްދުއް ޝަކޫރުގެ އަންހެނުން އައިޝަތު އަލީ ވަނީ މަރުވެފައެވެ. ދެން މަރުވެފައިވަނީ ނޮޅިވަރަންފަރު އަހިމާގެ ހުސެއިން އަބްދުﷲ އާއި އޭނާގެ އަންހެނުން މަރިޔަމް މައުސޫމް އާއި އެދެމަފިރިންގެ ދަރިފުޅު ފާތިމަތު ގުރައިޝާ އާއި ގުރައިޝާގެ ދަރިފުޅު އުމުރުން ތިން އަހަރުގެ އީރާ ހަސަން ޝިފާޒުއެވެ.
އިއްޔެގެ ހާދިސާގައި މަރުވި ފަސް މީހުން ރޭ ދަންވަރު ވަނީ ހަނިމާދޫގައި ވަޅުލާފައެވެ.