ޑިއެގޯ ގާސިއާ މޮރީޝަސްގެ ބައެއްގެ ގޮތުގައި ކަނޑައެޅުމަށް އދ. ގައި ނެގި ވޯޓަށް ދެކޮޅު ހެދި މަދު ގައުމުތަކުގައި ރާއްޖެ ހިމެނުމުން އެކަމާ ގުޅޭގޮތުން މަޝްވަރާގެ މޭޒަށް ރާއްޖެއާއި މޮރީޝަސް އިން އަތުވެއްޖެއެވެ.
ރާއްޖެއާއި މޮރީޝަސްއާ ދެމެދު މަޝްވަރާގެ މަސައްކަތް ފެށިފައިވާކަން ހާމަކުރެއްވީ ޚަރިޖީ ވަޒީރު، އަބްދުﷲ ޝާހިދު އެމްޑީޕީގެ ޔޫތް ކޮންގްރެސްގައި އޮތް ޕެނެލް ޑިސްކަޝަން އެއްގައެވެ.
ދިވެހި ސަރުކާރުން އޭރުވެސް ވަނީ މޮރީޝަސްއާ ދެކޮޅަށް ރާއްޖެއިން ވޯޓުދިނީ ރާއްޖޭގެ ސަރަހައްދީ އިމުގެ މައްސަލައެއް އދ. އަށް ހުށައެޅިފައިވާތީ ކަމަށެވެ. މޮރީޝަސްއާ އެއްކޮޅަށް ވޯޓު ދީފިނަމަ ރާއްޖޭގެ ކޮންޓިނެންޓަލް ޝެލްފްގެ ބައެއްގެ މިލްކުވެރިކަން ދިވެހިންނަށް ގެއްލުމުގެ ފުރުސަތު އޮންނާނެ ކަމަށް މިނިސްޓަރު ވިދާޅުވިއެވެ.
އަދި އެ ނަތީޖާ ބަދަލުނުވާނެހާ ހިނދަކު ރާއްޖެއިން ދިން ވޯޓު އެހެން ގޮތަކަށް ބަދަލު ނުވާނެ ކަމަށް ވެސް މިނިސްޓަރ ޝާހިދު ވިދާޅުވިއެވެ.