ހިތަދޫ ބަނދަރު މަގުން ސައިކަލެއްގައި ދަތުރުކޮށްފައި ދިޔަ މީހަކު މޫދާ ދިމާލުން ހިލަތަކުގެ މައްޗަށް ސައިކަލާއެކީ ވެއްޓި ބޮޑެތި ޒަޚަމްތަކެއް ލިބިއްޖެއެވެ.
މިހާދިސާ އަށް ފުލުހުން ގޮސް އެމީހާ ހިތަދޫ ރީޖަނަލް ހޮސްޕިޓަލަށް ގެންގޮސްފައިވާއިރު ފުލުހުން މައުލޫމާތު ދެމުން ބުނެފައިވަނީ ވެއްޓިފައިވަނީ 47 އަހަރުގެ ދިވެހި ފިރިހެނެއްކަމަށެވެ. އޭނާއަށް ބޮޑެތި ޒަޚަމްތަކެއް މިހާދިސާގައި ލިބިފައިވާއިރު ހޮސްޕިޓަލުން ބުނެފައިވަނީ އޭނާގެ ހާލު ސީރިއަސް ކަމަށާއި އައިސީޔޫގައި ފަރުވާ ދެމުން އަންނަ ކަމަށެވެ.
"އައްޑޫލައިވް" އަށް މައުލޫމާތު ލިބިފައިވާ ގޮތުގައި ވެއްޓިފައިވަނީ ބޯޓު ހުސް ކުރުމުގެ މަސައްކަތަށް ދިޔަ މީހެއް ކަމަށެވެ.
އެމީހާއަށް ލިބުނު އަނިޔާތައް ސީރިއަސް ކަމުން އެމަޖެންސީގައި މާލެ ފޮނުވުމުގެ މަސައްކަތް ކުރަމުން އަންނަ ކަމަށް މައުލޫމާތު ލިބިފައިވެއެވެ.