ނޫސްވެރިޔާ ރިލްވާން މަރާލާފައިވަނީ ރާއްޖޭގައި އުޅޭ ދީނީ ހަރުކަށި ޖަމާއަތަކުން ކަމަށް މަރުތައް ތަހުގީގު ކުރުމަށް އުފައްދާފައިވާ ރިޔާސީ ކޮމިޝަނުން ބުނެފިއެވެ.
މަރުތަކާއި ބެހޭ ކޮމިޝަނުން މިއަދު ބޭއްވި ނޫސް ކޮންފަރެންސްގައި ކަމިޝަންގެ ރައީސް ހުސްނުއް ސުއޫދު ވިދާޅުވީ މިހާތަނަށް ހޯދިފައިވާ ހޯދުންތަކުން ނޫސްވެރިޔާ ރިލްވާން މަރާލާފައިވަނީ ދީނީ ހަރުކަށި ޖަމާއަތަކުންކަން އެނގިފައިވާ ކަމަށެވެ.
ސުއޫދު ވިދާޅުވީ ކަމިޝަނުން މިހާތަނަށް ކުރި ތަހްގީގުން ޒުވާން ބްލޮގަރ ޔާމީން ރަޝީދު މަރާލުމާއި ރިލްވާން ވަގަށް ނަގައި މަރާލުމުގައި ބައިވެރިވެެފައިވަނީ އެއް ބަޔަކެވެ.
"މިނިވަން ފިކުރު"ގެ މީހުންނާއި ދީނީ ހަރުކަށި ފިކުރުގެ މީހުންނާ ދެމެދު 2010 ވަނަ އަހަރާއި 2011 ވަނަ އަހަރު ސޯޝަލް މީޑިއާގަ އާއި އެހެން ގޮތްގޮތުން ބަހުގެ ހަމަލާތައް ބަދަލުކުރަމުން ދިޔަ ކަމަށް ސުއޫދު ވިދާޅުވިއެވެ. އަދި 2011 ވަނަ އަހަރުގެ ޑިސެމްބަރު މަހުގެ 10 ވަނަ ދުވަހު ބޭއްވި ދީނީ މިނިވަންކަމަށް ގޮވާލި އެއްވުމުގައި ބައިވެރިވި މީހުންގެ ލިސްޓު ހަދައި އެމީހުންނަކީ މަރާލަން ޖެހޭ ބައެއް ކަމަށް އެފަރާތްތަކުން ހާމަކޮޮށްފައިވާ ކަމަށެވެ.
އެގޮތުން ސީރިއަށް ހަނގުރާމައަށްދާ ދިވެހިންނާއި ބެހޭ މައުލޫމާތު ސޯޝަލް މީޑިއާގައި އާއްމު ކުރާ ބިލާދުއްޝާމް މީޑިއާ" އިން ނޫސްވެރިޔާ ރިލްވާނާ އާއި މުއާމަލާތް ކޮށްފައިވާ ކަމަށް ސުއޫދު ވިދާޅުވިއެވެ.
ސުއޫދު ވިދާޅުވީ ދީނީ ހަރުކަށި ޖަމާއަތްތަކުގެ ނުރައްކާ ދިވެހިންނަށް ވަރަށް ބޮޑު ކަމަށާއި އެކަމުގައި ބޮޑު ނެޓްވޯކެއް ރާއްޖެއަށް ފެތުރިފައިވާ ކަމަށެވެ.
ރިލްވާންގެ މައްސަލާގައި ހޯދިފައިވާ ހޯދުންތަކުން އެނގޭ ގޮތުގައި އޭނާ މިހާރު ވަނީ މަރާލާފައިކަން ސުއޫދު ވިދާޅުވިއެވެ.
ސުއޫދު ވިދާޅުވީ ރިލްވާން މަރާލާފައިވަނީ ޑިންގީއަކަށް އަރުވައިގެން ގޮސްކަމަށް އެކަމުގައި ބައިވެރިވި މީހަކު ކިޔާދީފައިވާ އިރު އެކަމުގައި ފުށޫ އެރުންތަކެއް ހުރި ކަމަށެވެ. އަދި އެކަން އިތުރަށް ބަލަމުން އަންނަ ކަމަށެވެ.