ރާއްޖޭގައި ދީނީ ހަރުކަށި ފިކުރު އުފެދިގެން ދިޔައީ 30 އަހަރު ވެރިކަން ކުރެއްވި ކުރީގެ ރައީސް މައުމޫން އަބްދުލްޤައްޔޫމްގެ ވެރިކަމުގައި ދީނީ އިލްމުވެރިންގެ ދޫބަންދުކޮށް ޖަލަށް ލުމުގެ ސަބަބުން ކަމަށް ދީނީ އިލްމުވެރިޔާ، ޑރ. މުހައްމަދު އިޔާޒް އަބްދުއްލަތީފް ވިދާޅުވެއްޖެއެވެ.
މީގެ ފަސް އަހަރު ކުރިން މިނިވަން ނޫހުގެ ނޫސްވެރިޔާ އަހުމަދު ރިޟްވާން ވަނީ ދީނީ ހަރުކަށި ފިކުރުގެ ޖަމާއަތަކުން ވަގަށް ނަގައި ކަނޑުމަތީ މަރާލާފައި ކަމަށް އިއްޔެ މަރުތަކާ ބެހޭ ކޮމިޝަނުން އިއުލާންކޮށްފައިވާއިރު ކޮމިޝަންގެ ރައީސް ހުސްނުއް ސުއޫދު ވަނީ ހަރުކަށި ފިކުރު ފެތުރި މޫލައިގެން ގޮސްފައިވަނީ ހީކުރި ވަރަށް ވުރެ މާ މަތީ ދަރަޖައަކަށް ކަމަށެވެ.
އަދި މިއަދުވެސް ރާއްޖޭގައި ހަރަކާތްތެރިވަމުންދާ މިފިކުރަކީ މީގެ އެތައް އަހަރެއް ކުރިން ހިމަންދޫގައި އުފެދި ސަރުކާރަށް ގޮންޖެހި ހަރުކަށި ފިކުރުގެ ޖަމާއަތާއި ސަލްޓަން ޕާކް ކުރިމަތީ ބޮން ގޮއްވުމުގެ ހާދިސާ ހިންގި މީހުން ކަމަށް ސުއޫދު ވިދާޅުވިއެވެ. އަދި ސީރިޔާއަށް ހަނގުރާމައަށް ދިއުމާއި ދިވެހި ޒުވާނުން ރެކްރޫޓް ކޮށް ފޮނުވުމުގެ މަސައްކަތް ވެސް ކުރަނީ ހަމަ މިމީހުން ކަމަށް ސުއޫދު ފާހަގަކުރިއެވެ.
ރައީސް މައުމޫންގެ ވެރިކަމުގައި ދީނީ ވައުޟު ނަސޭހަތް ދިނުމާއި އިލްމުވެރިންނަށް ދީނީ ގޮތުން މައުލޫމާތު ފެތުރުން ވަނީ ވަރަށް ބޮޑަށް ހިފަހައްޓާފައެވެ. އަދި ސުވަރުގެ އާއި ނަރަކަ ފަދަ މައުޟޫތަކަށް ސްކޫލްތަކުގައި ކިޔަވައި ދިނުން ވެސް އެއް ދުވަސްވަރެއްގައި މަނާ ކުރިއެވެ.
މައުމޫންގެ ވެރިކަމުގައި ދީނީ އިލްމުވެރިން އެކި ފަހަރު މަތިން ޖަލަށްލައި ގަދަކަމުން ތުނބުޅި ބޭލުވި މައްސަލަވެސް ވަނީ އެކި ފަހަރު މަތިން ފެންމަތިވެފައެވެ.