ކުރީގެ ރައީސް އަބްދުﷲ ޔާމީނާ ދެކޮޅަށް ދައުލަތުން ކުރާ މަނީ ލޯންޑަރިންގެ ދައުވާގެ އިތުރު އަޑުއެހުމެއް މިއަދު ހެނދުނަށް ތާވަލުކޮށްފިއެވެ.
ކްރިމިނަލް ކޯޓުގައި އެންމެ ފަހުން ބޭއްވި އަޑުއެހުން ނިންމަވާލައްވަމުން އިސް ގާޒީ އަހުމަދު ހައިލަމް ވަނީ މިމައްސަލައިގެ އިތުރު ޝަރީއަތެއް މިއަދު ބޭއްވޭނެ ކަމަށެވެ. އަދި މިއަދުގެ ޝަރީއަތުގައި އިތުރު ހެކިންގެ ހެކިބަސް ނަގައި ސުވާލުކުރުން އޮންނާނެ ކަމަށް ވިދާޅުވިއެވެ.
ރައީސް ޔާމީންގެ އެންމެ ފަހުގެ ޝަރީއަތުގެ އަޑުއެހުމުގައި ކުރީގެ ނައިބު ރައީސް އަހުމަދު އަދީބުގެ އިތުރުން އެމްއެމްޕީއާރުސީގެ ކުރީގެ މެނޭޖިން ޑިރެކްޓަރ އަބްދުﷲ ޒިޔަތުގެ ހެކިބަސް ވަނީ ނަގާފައެވެ.
އަދީބާއި ޒިޔަތު ވެސް ބުނެފައިވަނީ އެސްއޯއެފްގެ އެކައުންޓަށް އެއް މިލިއަން ޑޮލަރު ޖަމާކުރީ ޔާމީން އަންގަވައިގެން ކަމަށާއި އެ އެއް މިލިއަން ޑޮލަރު ޔާމީން އެކައުންޓަށް އެސްއޯއެފުން ޖަމާ ކުރީވެސް ސީދާ އެމަނިކުފާނު އެގޮތަށް އިރުޝާދު ދިނުމުން ކަމަށެވެ. ޔާމީން ވަނީ އެވާހަކަތައް ޝަރީއަތުގެ މަޖިލީހުގައި ދޮގުކުރައްވާފައެވެ.