މިދިޔަ ދައުރުގައި ހިއުމަން ރައިޓްސް ކޮމިޝަނަށް އައްޔަން ކުރެވުނު މެމްބަރުންގެ ތެރޭގައި 24 މިލިއަނުގެ ޚިޔާނާތުގެ ބޮޑު ތުހުމަތެއް ކުރެވި ދައުވާ ކުރުމަށް ފޮނުވާފައިވާ ބޭފުޅަކު އިންނެވުމަކީ ބަލައިގަނެވޭނެ ކަމެއް ނޫން ކަމަށް ހިންނަވަރު ދާއިރާގެ މެމްބަރު ޖީހާން މަހްމޫދު ވިދާޅުވެއްޖެއެވެ.
މިއަދުގެ ޖަލްސާގައި ވާހަކަ ދައްކަވަމުން ޖީހާން ވިދާޅުވީ، ޑިޒާސްޓާ މެނޭޖްމެންޓުން 24 މިލިއަން ރުފިޔާގެ ކޮރަޕްޝަންގެ މައްސަލައެއް އޮތް ބޭފުޅަކު ވަނީ މިދިޔަ ދައުރުގައި އެޗްއާރުސީއެމަށް ގެންނަވާފައި ކަމަށެވެ. އަދި މިއަދުވެސް ކޮމިޝަންގެ މެމްބަރެއްގެ ގޮތުގައި އޭނާ އިންނަވާ ކަމަށާއި އެއީ ބަލައިގަނެވޭނެ ކަމެއް ނޫން ކަމަށެވެ.
ކުރީގެ ރައީސް ޔާމީންގެ ވެރިކަމުގައި އެޗްއާރުސީއެމަށް އައްޔަން ކުރެއްވި މޫސާ ކަލޭފާނާ ދެކޮޅަށް ކޮރަޕްޝަންގެ މައްސަލައެއް ބަލައި ޕީޖީ އަށް ވަނީ ދައުވާ ކުރުމަށް ފޮނުވާފައެވެ. މޫސާ ކަލޭފާނު ވަނީ 2013 ވަނަ އަހަރު ފުލުހުންނަށް ބަޔާން ދިނުމުގައި ތެދު ބަހުން ބަޔާން ދީފައިނުވާ ކަމުގެ ތުހުމަތުގައި ހައްޔަރުވެސް ކޮށްފައެވެ. އަދި ހެކި ނައްތާލަން މަސައްކަތް ކުރި ކަމުގެ ތުހުމަތުވެސް ކުރެވުނެވެ.
ޖީހާން ވަނީ މިފަދަ ބޭފުޅުން މިނިވަން މުއައްސަސާތަކުގެ މެމްބަރުންގެ ގޮތުގައި ތިއްބެވުމުން މުއައްސަސާތަކުގެ ނަޒާހަތްތެރިކަން ގެއްލިދާ ކަމަށް ވިދާޅުވެފައެވެ.
ޖީހާންގެ އިތުރުން މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީވެސް ވަނީ މިމައްސަލައަށް ވާހަކަ ދައްކަވާފައެވެ. އިންތި ވިދާޅުވީ މިފަދަ ތުހުމަތެއް ކުރެވޭ ފަރާތަކަށް ކޮމިޝަނަށް އައްޔަން ކުރުމުގެ ފުރުސަތުވެސް ދެވިގެން ނުވާނެ ކަމަށެވެ.