ސ. ހިތަދޫ މަގު ބައްތިތައް މަރާމާތުކޮށް ބަލަހައްޓައި ދޭނެ ފަރާތެއް ހޯދުމަށް އައްޑޫ ސިޓީ ކައުންސިލުން އަނެއްކާ ވެސް އިއުލާންކޮށްފި އެވެ.
ކައުންސިލުން ބުނީ އަލުން އިއުލާން ކުރީ ކުރިން ކުރި އިއުލާނާ ގުޅިގެން ހުށަހެޅި ބިޑްޑޮކިއުމެންޓްތައް ފުރިހަމަ ނުވާތީ ކަމަށެވެ.
ކައުންސިލުން ބުނީ މަރާމާތުކޮށް ބަލަހައްޓަން ބޭނުން ވަނީ ހިތަދޫ އެޅެދީދީ މަގު ލިންކް ރޯޑް އަދި ދަރުބާރުގޭ ސަރަޙައްދުގައި ހުރި 156 ލައިޓާއި ރޯޑް ޑެކޮރޭޓިވް ލައިޓް-5 ބައްތީގެ 45 ލައިޓާއި ހިތަދޫ ޒޯން ސްޓޭޑިއަމް ކުރިމަތި އަދި ހިތަދޫ ބަނދަރުގައި ހުރި 15 ލައިޓްގެ އިތުރުން ހިތަދޫގެ އެހެނިހެން މަގުތަކުގައި ހުރި 498 ލައިޓް ކަމަށެވެ.
ކައުންސިލުން ބުނީ މި ބައްތިތައް މަރާމާތުކޮށް ބަލަހައްޓައި ދޭން ޝައުޤުވެރިވާ ފަރާތްތަކުން 03 ޖުލައި 2013 ވާ ބުދަ ދުވަހުގެ 11:00 އަށް ކައުންސިލް އިދާރާ އަށް ވަޑައިގެން މަޢުލޫމާތު ސާފު ކުރެއްވުމަށް ފަހު 07 ޖުލައި 2013 ވާ އާދީއްތަ ދުވަހުގެ 11:00 އަށް ޕްރޮޕޯސަލް ހުށަހަޅަން ޖެހޭނެ ކަމަށެވެ.
އަދި މަޢުލޫމާތު ދިނުމާއި އަންދާސީ ހިސާބު ބަލައިގަތުމަށް ހަމަޖެހިފައިވާ ގަޑީގެ ފަހުން ވަޑައިގަންނަވާ ފަރާތްތަކަށް ޕްރޮޕޯސަލް ބަލައިގަތުމުގެ ސެޝަނުގައި ބައިވެރި ނުވެވޭނެ އެވެ.
އަދި މައުލޫމާތު ހޯދުމަށް ވަޑައިނުގަންނަވާ ފަރާތްތަކަށް ޕްރޮޕޯސަލް ހުށަހެޅުމުގެ ފުރުޞަތު ވެސް ނޯނާނެ ކަމަށް ކައުންސިލުން ބުނެ އެވެ.