ކޮމިޝަނަރ ޖެނެރަލް އޮފް ޓެކްސޭޝަން، ޔަޒީދު މުހައްމަދުގެ މަގާމު މަޖިލީހުން ގެއްލުވާލުމުން އެކަމަށް ޖުމުހޫރީ ޕާޓީގެ ލީޑަރ އަދި މާމިގިލި ދާއިރާގެ މެމްބަރު ގާސިމް އިބްރާހިމް ފާޑުވިދާޅުވެއްޖެއެވެ.
ޓެކްސްގެ ގާނޫނަށް ބަދަލު ގެނެސް ރައްޔިތުންގެ މަޖިލީހުން އިއްޔެ ފާސްކޮށްފައިވާއިރު ޖޭއެސްސީގެ ގާނޫނަށް ބަދަލު ގެނެސް މަޖިލީހުން ވަނީ ޗީފް ޖުޑީޝަލް އެޑްމިނިސްޓްރޭޓަރ ޑރ. އަބްދުﷲ ނަޒީރުގެ އިތުރުން ޖުޑީޝަލް އެކެޑެމީގެ ޗާންސެލަރ އަހުމަދު މާޖިދުގެ މަގާމުވެސް ގެއްލޭ ގޮތަށް ފާސްކޮށްފައެވެ.
މިއަދުގެ ޖަލްސާގައި ވާހަކަ ދައްކަވަމުން ގާސިމް ވިދާޅުވީ ގާނޫނަށް ބަދަލު ގެނެސްގެން، ވަކި މީހަކަށް ޓާގެޓުކޮށް މަގާމު ގެއްލުވާލުމަށް ތާއީދު ނުކުރައްވާ ކަމަށެވެ.
މާދަމާ މިމަޖިލީހުން ގާނޫނު ބަދަލުކޮށްގެން ރައީސުލް ޖުމުހޫރިއްޔާގެ މަގާމުވެސް ގެއްލުވާލުން ނުވަތަ މެމްބަރުންގެ ދައުރުގެ މުއްދަތު ފަސް އަހަރުން ތިން އަހަރަށް ބަދަލުކުރެވިދާނެ ކަމަށާއި ނަމަވެސް އެއީ އުސޫލެއް ނޫން ކަމަށް ގާސިމް ވިދާޅުވިއެވެ.
މުއައްސަސާއެއްގެ ވެރިޔަކު ގޯސް އަމަލެއް ކުރައްވާނަމަ އޮންނަ އުސޫލެއްގެ މަތިން އެ ވެރިޔަކަށް ފިޔަވަޅު އަޅައި މަގާމުން ދުރުކުރިޔަސް މައްސަލައެއް ނެތް ކަމަށް ވިދާޅުވެ ގާސިމް ވަނީ މިގޮތަށް މަޖިލީހުން އަމަލުކުރަން ތާއީދު ނުކުރައްވާ ކަން ތަކުރާރުކޮށްފައެވެ.
ގައުމުގެ މަސްލަހަތު މަޖިލީހުން އިސް ކުރައްވަން ވާނެ ކަމަށާއި ގައުމު ހަލާކުގެ ތެރެއަށް ވައްޓާލަން ފުރުސަތު ނުދިނުމަށް ގާސިމް ވަނީ މިއަދުގެ ޖަލްސާގައި މަޖިލީހުގެ ރައީސަށާއި މެމްބަރުންނަށް އިލްތިމާސް ކުރައްވާފައެވެ.