މިހާރު ރާއްޖޭގައި އޮތީ ތިން ބާރު ވަކިވެފައިވާ ވެރިކަމުގެ ނިޒާމެއް ނޫން ކަމަށާއި ޤާނޫނުއަސާސީ ގެ 7 މ އިން ޤާއިމްކޮށްފައިވާ ބާރުތައް ވަކިވެފައި އޮންނަ ނިޒާމު ނެތިގެން ހިނގައްޖެ ކަމަށް ކުރީގެ ނައިބު ރައީސް ޑރ. މުހައްމަދު ޖަމީލް އަހުމަދު ވިދާޅުވެއްޖެއެވެ.
ޑރ. ޖަމީލް މިހެން ވިދާޅުވެފައިވަނީ އިއްޔެ ރައީސުލް ޖުމުހޫރިއްޔާ ތަސްދީގު ކުރެއްވި ޑީޖޭއޭ، ޖޭއެސްސީގެ ދަށަށް ބަދަލުވާ އިސްލާހަށް ފާޑުވިދާޅުވެ ކުރެއްވި ޓުވީޓެއްގައެވެ. ޖަމީލް ވަނީ އެ އިސްލާހު ތަސްދީގު ކުރެއްވުން ކުށްވެރި ކުރާ ކަމަށެވެ.
މިބަދަލާއެކު ޗީފް ޖުޑީޝަލް އެޑްމިނިސްޓްރޭޓަރަކަށް ހުންނެވި ޑރ. އަބްދުﷲ ނަޒީރުގެ މަގާމު ވަނީ ގެއްލިފައެވެ. އަދި ޑީޖޭއޭއަށް ޖުޑީޝަލް އެޑްމިނިސްޓްރޭޓަރަކު އައްޔަން ކުރަން ޖެހޭ ގޮތަށް ވަނީ ގާނޫނު ބަދަލުކޮށްފައެވެ.
ޑރ. ޖަމީލްގެ އިތުރުން ޖޭޕީގެ ލީޑަރ ގާސިމް އިބްރާހިމް ވެސް ވަނީ، ވަކި މީހަކު ވަޒީފާއިން ވަކިކުރުމަށް ގާނޫނު އިސްލާހު ކުރުމަކީ ރަނގަޅު ގޮތެއް ނޫން ކަމަށް ވިދާޅުވެ މަޖިލީހަށް ފާޑުވިދާޅުވެފައެވެ.