މި ހަފްތާއަކީ މަސްވެރިކަން ރަނގަޅު ހަފްތާއެއް ނަމަވެސް މަސް ނުކިރި ތިބެން ޖެހުމުން ގެއްލުންވަމުންދާ ކަމަށް ބުނެ މަސްވެރިން ޝަކުވާ ކޮށްފިއެވެ.
"އައްޑޫލައިވް" އާ ވާހަކަ ދައްކަމުން ދޯންޏަކުން ކިޔާދީފައިވާ ގޮތުގައި މިހަފްތާގައި މަސްވެރިކަން ރަނގަޅުވެ ދޯނިތަކުން ގިނައިން މަސް ބާނަމުން އަންނަ ކަމަށެވެ. ނަމަވެސް އިއްޔެއިން ފެށިގެން މަސް ކިރުމުގައި ދަތިތަކެއް އުޅޭ ކަމަށާއި މަސް ނުކިރި ލަސްވާނަމަ މަސްކޮޅު ބޭކާރުވުމުގެ ފުރުސަތު އެބަ އޮތް ކަމަށެވެ.
މަސްވެރިން މިހާރު މަސް ބޭނުމަށް އުޅެނީ ވ. އަތޮޅު ހިސާބުގައި ކަމަށާއި އެހިސާބުގައި މަސް ކިރާ ބޯޓެއް ވެސް ނެތް ކަމަށް މައުލޫމާތު ދިން ފަރާތުން ބުނެފައިވެއެވެ.
މަސްވެރިންނަށް ލުއި ފަސޭހަވާނެ ގޮތަށް ސަރުކާރުން ބިލް ހުށައަޅަމުންދާއިރު މަސްވެރިންނަށް އެންމެ ބޭނުންވާ ކަން ކުރުމުގައި ދަތިތަކެއް ހުރުމުން އެކަމާ ގުޅޭގޮތުން ކަންބޮޑުވުން ފާޅުކުރަމުން އެބަ ގެންދެއެވެ. މަސް ނުކިރި ދުވަސްވެ އައިސް ހުސްވުމުން ދެން ޖެހޭނީ މަސްކޮޅު އުކާލާށެވެ. ސަބަބަކީ ރަށަކަށް ގޮސް ވިއްކާލެވުމުގެ ކުރިން މަސް ހަލާކުވާނެތީ ކަމަށް މަސްވެރިން ބުނެފައިވެއެވެ.