ނޫސްވެރިޔާ އަހުމަދު ރިޟްވާން ވަގަށް ނެގި މައްސަލާގައި މަރުތަކާ ބެހޭ ކޮމިޝަނުން ނިންމި ރިޕޯޓުގައި ގާނޫނާ ޚިލާފުވި ކަމަށް ބުނާ ފުލުހުންގެ އިންޓެލް ދެ އޮފިސަރުން ވަޒީފާއިން ވަކިކޮށްފައިވަނިކޮށް އަލުން ވަޒީފާއަށް ރިޔާސީ އިންތިޚާބަށް ފަހު ނަމަވެސް ރައީސް އިބްރާހިމް މުހައްމަދު ސޯލިހް ވެރިކަމަށް ނާންނަނީސް ކަމަށް ފުލުހުން ބުނެފިއެވެ.
ކުރީގެ ހޯމް މިނިސްޓަރު އުމަރު ނަސީރު ވަނީ އެ ދެފުލުހުން ވަޒީފާއިން ވަކިކޮށްފައިވަނިކޮށް އަލުން ފުލުހުންގެ ވަޒީފާއަށް ވެއްދީ މިސަރުކާރުން ކަމަށް ބުނެފައެވެ. ނަމަވެސް ފުލުހުން ވަނީ އެވާހަކަތައް ދޮގުކޮށްފައެވެ.
ފުލުހުންގެ ތަރުޖަމާނު އިޒްމިއާ ޒާހިރު މިހެން ވިދާޅުވެފައިވަނީ އެ ދެފުލުހުން އަނބުރާ ވަޒީފާއަށް ވެއްދީ މިސަރުކާރު އައި ފަހުން ކަމަށް ޚަބަރު ފެތުރެމުންދަނިކޮށެވެ.
ދެ ފުލުހުން ވަޒީފާއަށް އަލުން ވަދެފައިވަނީ 2018 ވަނަ އަހަރުގެ ނޮވެމްބަރު މަހުގެ 7 ގައެވެ. އޭރު އަދި ރައީސް އިބްރާހިމް މުހައްމަދު ސޯލިހް ވެރިކަމާއި ހަވާލުވެފައިނުވާއިރު އޭރު ސީޕީއަކަށް ހުންނެވީ ވެސް ކުރީގެ ރައީސް ޔާމީން އައްޔަން ކުރެއްވި ހަމްދޫން ރަޝީދެވެ.
ދެ ފުލުހުން ގާނޫނާއި ޚިލާފުވެފައިވާ ކަމަށް އިއުތިރާފްވެފައިވާއިރު ބަންޑާރަ ނައިބުގެ އޮފީހުން ވަނީ ދެ ފުލުހުން ހައްޔަރުކުރުމަށް ކޯޓު އަމުރަކަށް އެދުމަށް ލަފާ ދީފައެވެ. ނަމަވެސް ތަހުގީގު ކުރީ ކޮމިޝަނުން ކަމަށްވާތީ ސީޕީ ހަމީދު ވަނީ ކޯޓު އަމުރަކަށް އެދެވޭނީ ކޮމިޝަނަށް ކަމަށް ބުނެފައެވެ.
ފުލުހުން މިމައްސަލައާ ގުޅިގެން ބުނެފައިވަނީ ކޮމިޝަނާއި މަޝްވަރާ ކުރުމުން މައުލޫމާތު ދިން ގޮތުގައި ދެ ފުލުހުންނާ ދެކޮޅަށް ޖިނާއީ ދައުވާ ކުރުމަށް ބޭނުންވާ ހެކި ލިބިފައި ނެތް ކަމަށެވެ.