ދީނީ ހަރުކަށި ފިކުރުތައް ފަތުރާ ޖަމާއަތްތަކާއި ދެކޮޅަށް މިއަދުން ފެށިގެން ފިޔަވަޅު އެޅޭނެ ކަމަށާއި ކުރިއަށް އޮތް ތަނުގައިވެސް އެ ޖަމާއަތްތަކާ ދެކޮޅަށް އެޅޭ ފިޔަވަޅުތައް ރައްޔިތުންނަށް ފެނިގެންދާނެ ކަމަށް ރައީސުލް ޖުމުހޫރިއްޔާ އިބްރާހިމް މުހައްމަދު ސޯލިހް ވިދާޅުވެއްޖެއެވެ.
ނޫސްވެރިޔާ އަހުމަދު ރިޟްވާން ވަގަށް ނަގާފައިވާ މައްސަލަ ތަހުގީގުކުރުމަށް ފަހު މަރުތަކާ ބެހޭ ކޮމިޝަނުން އާންމުކުރި ރިޕޯޓާ ގުޅިގެން ރައީސް ދެއްވި ޕްރެސް ކޮންފަރެންސެއްގައި ވިދާޅުވީ އެމަނިކުފާނުގެ އަމާޒަކީ ރިޟްވާނަށް ވީގޮތް ހޯދުމާއި، އެކަން ކުރުމުގައި ޝާމިލްވި ފަރާތްތަކަށް އިންސާފުގެ ކުރިމައްޗަށް ގެނައުމުގެ އިތުރުން ދެން އެފަދަ ކަމެއް ތަކުރާރުނުވާނެ ގޮތަށް އަމަލު ކުރުން ކަމަށެވެ.
ނަމަވެސް މިއަދު ރާއްޖޭގައި އޮތް ޓެރަރިޒަމްގެ ގާނޫނާއި ޖިނާއީ އިޖުރާއަތުގެ ގާނޫނުން ބައެއް ހުރަސްތަކެއް ހުރި ކަމަށާއި ނަމަވެސް އެ ގާނޫނުތަކަށް ބަދަލު ގެނެސް، ޓެރަރިޒަމް ރާއްޖެއިން ނައްތާލަން މަސައްކަތް ފެށިފައިވާ ކަމަށް ރައީސް ވިދާޅުވިއެވެ.
އަދި ފުލުހުންނާއި ސިފައިންގެ އިތުރުން މަރު ކޮމިޝަނާއި ޕްރޮސެކިއުޓާ ޖެނެރަލް އަދި އެޓާނީ ޖެނެރަލް ކުރައްވާ މަސައްކަތް މިއަދު ފެނިގެން ދާނެ ކަމަށް ރައީސް ވިދާޅުވެފައިވެއެވެ.
މަރު ކޮމިޝަނުން މިމައްސަލައިގެ ތަހުގީގީ ރިޕޯޓުގެ ދެ ޑްރާފްޓެއް ވަނީ ރައީސަށް އަރުވާފައެވެ. އޭގެ ތެރެއިން ފުރަތަމަ ޑްރާފްޓު މޭމަހުގެ އަރުވާފައިވާއިރު ދެވަނަ ޑްރާފްޓު އެރުވީ ސެޕްޓެމްބަރު 1 ގައި، ނޫސްވެރިންނާ ބައްދަލުކުރުމުގެ ކުރިން ކަމަށް އެމަނިކުފާނު ވިދާޅުވެފައިވެއެވެ.