އައްޑޫ ސިޓީ ގުޅިފައިވާ ރަށްތަކަށް ކަރަންޓު ދެމުންދާ މަރުކަޒީ އިންޖީނުގޭގެ އިންޖީނުތަކަށް ދިމާވެފައިވާ މައްސަލަ ހައްލުނުކުރެވި މިއަދުވެސް އެކި ހިސާބުތަކުން ކަރަންޓު ކަނޑަމުން އެބަދެއެވެ.
އިއްޔެ ހަވީރު 5 ޖަހަން އުޅެނިކޮށް މުޅި ސިޓީއިން ކަރަންޓު ކެނޑުމަށްފަހު އެއްކޮށް ކަރަންޓު ދެވިފައިވަނީ ރޭ ދަންވަރު 1 ޖަހައި ބޮޑުވެފައިވަނިކޮށެވެ. މައްސަލަ ދިމާވެގެން އުޅެނީ ކޮން ސަބަބަކާ ލައިގެން ކަމެއް ފެނަކައިން ބުނެފައިނުވި ނަމަވެސް އެކި ފަހަރު މަތިން، ވީހާވެސް އަވަހަށް މައްސަލަ ހައްލުކޮށްދޭނެ ކަމަށް އެކުންފުނިން ބުނެފައިވެއެވެ.
އިއްޔެ ގުޅިފައިވާ ހުރިހާ ރަށަކުން އެއްފަހަރާ ކަރަންޓު ކެނޑުނު ނަމަވެސް މިއަދު ކަނޑަމުން ދަނީ އެކި ހިސާބުތަކުން އެކި ގަޑިތަކުގައެވެ. މައުލޫމާތު ލިބޭ ގޮތުގައި ފެނަކައިގެ ޓެކްނީޝަނުން މިހާރު ބަލަމުންދަނީ ކަރަންޓު ކެނޑުނު ސަބަބެވެ.
ކަރަންޓު މައްސަލައަށް ދާއިމީ ހައްލެއް ނުލިބޭތީ އައްޑޫގެ އެމްޑީޕީއަށް ނިސްބަތްވާ މަޖިލިސް މެމްބަރުން ވަނީ ފެނަކަ ކޯޕަރޭޝަނަށް ފާޑުވިދާޅުވެފައެވެ.