ދުނިޔޭގެ އެންމެ ވަރުގަދަ ފޯނު އުފައްދާ އެއް ކުންފުނި ސެމްސެންގް އިން ވަނީ ލިނަކްސް އާ ގުޅިގެން ފޯނެއް އުފެއްދުމަށް ނިންމައިފަ އެވެ.
މި ފޯނުގައި ބޭނުން ކުރާނީ ލިނަކްސްގެ އޯއެސް އެކެވެ. "ޓައިޒެން" ގެ ނަމުން ނަން ދެވިފައިވާ މި އޯއެސް ވެގެން ދާނީ އެންޑްރޮއިޑް އާއި ވާދަ ކުރާނެ އޯއެސް އަކަށެވެ.
އޯޕެން ސޯސް އޯއެސް ތަކަށް ލޯބި ކުރާ މީހުންނަށް ޓައިޒެން ވަރަށް ކަމުދާނެ ކަމަށް ބެލެވެ އެވެ. އޯޕެން ސޯސް ސޮފްޓްވެއާ ތަކަކީ ޔޫޒަރުން ބޭނުންވާ ގޮތަކަށް އެ ސޮފްޓްވެއާތަކުގެ ސޯސް ކޯޑް ބަދަލު ކޮށް އެ ސޮފްޓްވެއާ ތައް ކޮޕީ ކުރުމުގެ މިނިވަންކަން އޮންނަ ސޮފްޓޮވެއާ ތަކެވެ.
ލިނަކްސް ގެ ސޮފްޓްވެއާތަކަކީ މުޅިން އޯޕެން ސޯސް ސޮފްޓްވެއާ ތަކަކަށް ވުމުން ޓައިޒެން ބޭނުން ކޮށްގެން ޔޫޒަރުން ބޭނުން ގޮތަކަށް އެ މީހުންގެ ފޯން ތައް ކަސްޓަމައިޒް ކުރެވޭނެ އެވެ.
މި އަހަރު ތެރޭ ނެރުމަށް ހަމަޖެހިފައިވާ މި ފޯނެ ފުރަތަމަ ލޯންޗް ކުރާނީ ޖަޕާނުގެ ޑޮކޮމޯ ކެރިއާ އަށެވެ. ދުނިޔޭގެ ބޮޑެތި ކެރިއަރުން ތަކެއް ވަނީ މި ފޯނަށް ޝައުގުވެރިކަން ފާޅު ކޮށްފަ އެވެ.
ކުރިއަށް އޮތް ތަނުގައި ޓައިޒެން އޯއެސް ބޭނުން ކުރާ ޓެބްލެޓް އަދި ޓިވީ ވެސް ފެނިދާނެ ކަމަށް ރިޕޯޓް ތައް ބުނެއެވެ.