ވަގަށް ނެގުމަށްފަހު މަރާލާފައިވާ ނޫސްވެރިޔާ އަހުމަދު ރިޟްވާން އަބްދުﷲ މެރުމުގައި އަތެއްވާ ކަމަށް މަރު ކޮމިޝަނުން ތައްޔާރުކުރި ރިޕޯޓުގައި ބުނާ ސ. ފޭދޫ ގުރަހާގޭ، އަހުމަދު އަގުލީލް(ކިޑު) ގެ ފޯނާއި ލެޕްޓޮޕް ފުލުހުންގެ ބެލުމުގެ ދަށަށް ގެންދިއުމަށް ފަހު އޭނާ ދޫކޮށްލައިފިއެވެ.
ކޯޓު އަމުރަކާއެކު ފުލުހުން މިރޭ ކިޑުގެ ގެއަށް ވަދެ ބަލާ ފާސްކޮށްފައިވާއިރު މާލޭގައިވެސް ކޯޓު އަމުރާއެކު ފުލުހުން ވަނީ ބައެއް ގެތަކަށް ވަދެ މީހުންވެސް ހައްޔަރުކޮށްފައެވެ. ފުލުހުންގެ ބެލުމުގެ ދަށަށް ކިޑު ގެންދިޔަ ނަމަވެސް މިހާރު އޭނާ މިނިވަން ވެފައިވާކަން "އައްޑޫލައިވް" އަށް ވަނީ ކަށަވަރުވެފައެވެ.
ނޫސްވެރިޔާ ރިޟްވާން މަރާލުމަށް ބޭނުންކުރި ދޯނި ހަމަޖެއްސި މީހަކީ އަގުލީލު ކަމަށް މަރު ކޮމިޝަންގެ ރިޕޯޓުގައި ބުނެފައިވާއިރު އޭނާއަކީ ޖިހާދީ ފިކުރުގެ އޮޕަރޭޝަންތައް ހިންގުމުގައި އިސް ދައުރެއް އަދާ ކުރާ މީހެއް ކަމަށް އެ ރިޕޯޓުގައި ބުނެފައިވެއެވެ. ނަމަވެސް ކިޑު ވަނީ އޭނާއާ ދެކޮޅަށް ކުރެވެނީ ދޮގު ތުހުމަތެއް ކަމަށް ބުނެ އޭނާއާ ދެކޮޅަށް އެކަމާއި ގުޅުވައި ހޯދޭނެ ހެއްކެއް ނޯންނާނެ ކަމަށް ބުނެފައެވެ.