ރޭ މާލޭ ބަނދަރުގައި އޮތް ބެސްޓް ލައިން ބޯޓުގައި ގޭސްފުޅިއެއް ގޮވާ ހިނގި އަލިފާނުގެ ހާދިސާގެ ސަބަބުން ތިން މީހެއްގެ ހާލު ސީރިއަސް ކަމަށް އައިޖީއެމްއެޗުން ބުނެފިއެވެ.
ހޮސްޕިޓަލުން ބައެއް މީޑިޔާތަކަށް މައުލޫމާތު ދެމުން ބުނެފައިވަނީ އަލިފާނުގެ ހާދިސާގައި ޒަޚަމްވެގެން ގެނައި 6 މީހުންގެ ތެރެއިން ތިން މީހެއްގެ ހާލު ސީރިއަސްވެ އެކަކު އައިސީޔޫގައި އަދި އަނެއް ދެ މީހުން ހައި ޑިޕެންޑެންސީ ޔުނިޓް(އެޗްޑީޔޫ) ގައި ފަރުވާދެމުން ގެންދާ ކަމަށެވެ.
ނަމަވެސް އަނެއް ތިން މީހުނަށް މިހާރު ފަރުވާ ލިބެމުންދަނީ ވޯޑުން ކަމަށް ހޮސްޕިޓަލުން ބުނެފައިވެއެވެ. ހާލު ސީރިއަސް ވެގެން އައިސީޔޫގައި ފަރުވާ ދެމުންދަނީ ބިދޭސީއަކަށް ކަމަށާއި އެޗްޑީޔޫގައި އޮތް ދެމީހުންގެ ތެރެއިން އެކަކީވެސް ބިދޭސީއެއް ކަމަށް އައިޖީއެމް ހޮސްޕިޓަލުން މައުލޫމާތުދެއެވެ.
ބެސްޓް ލައިން ބޯޓަކީ އައްޑޫ ސިޓީ މީދޫ ބޯޓެކެވެ. އާންމުކޮށް މާލެއާއި އައްޑޫއާ ދެމެދު ދަތުރުކުރަމުން އަންނަ މުދާ އުފުލާ މިބޯޓުގައި އަލިފާނުގެ ހާދިސާއެއް ހިނގާފައިވަނީ ބޭނުންކުރަމުން އައި ގޭސްފުޅިއަކުން ގޭސް ލީކުވުމުގެ ސަބަބުން ކަމަށް މައުލޫމާތު ލިބެއެވެ.