އޭޝިއަން ޑިވެލޮޕްމެންޓް ބޭންކް (އޭޑީބީ) ގެ އެހީގައި އައްޑޫ ސަރަހައްދީ ބަނދަރާއި މާލޭގެ ވިޔަފާރި ބަނދަރުތައް ތަރައްޤީ ކުރުމަށް ނިންމާފައިވާކަމަށް މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ބުނެފި އެވެ.
އެ ކުންފުނީގެ ސީއީއޯ މުހައްމަދު ލަތީފު ވިދާޅުވީ މި ދެ ބަނދަރު ތަރައްޤީ ކުރުމާ ބެހޭ ގޮތުން މަޝްވަރާ ރެވި، މެރިޓައިމް ޓްރާންސްޕޯޓް ޕްލޭނާ އެއްގޮތަށް މާލޭގެ ވިޔަފާރި ބަނދަރު އެހެން ތަނަކަށް ބަދަލު ކުރުމަށް ނިންމާފައިވާ ކަމަށެވެ.
ލަތީފް ވިދާޅުވީ އޭޑީބީގެ އެހީގައި އައްޑޫ ސަރަހައްދީ ބަނދަރު ކުރަން މަގަތު ފާލަމެއް އަޅާ 400 މީޓަރުގެ ކޯޒްވޭއަކާ ގުޅާލުމަށް ހަމަޖެހިފައިވާ ކަމަށެވެ.
މީގެ އިތުރުން އެމްޕީއެލް އިން ރާއްޖޭގެ އެކި ހިސާބުތަކުގައި ހިންގަމުންދާ ބަނދަރުތަކަށް ބަދަލުތަކެއް ގެނެސް ތަރައްޤީ ކުރުމަށް ހަމަޖެހިފައިވާ ކަމަށް ވެސް ލަތީފު ވިދާޅުވި އެވެ.
އޭނާ ވިދާޅުވީ ބަނދަރުތައް ތަރައްޤީ ކުރުމުގެ އިތުރުން ދުނިޔޭގެ އެހެން ޤައުމުތަކުގައި މިފަދަ ހާބަރުތައް ހިންގާ ގޮތް ބަލާ ރާއްޖޭގެ ބަނދަރުތަކުގެ ހިންގުން ބަދަލު ކުރަން ވިސްނާފައިވާ ކަމަށެވެ.