ދިއްދޫ ދާއިރާގެ ކުރީގެ މެމްބަރު އަބްދުއްލަތީފް(ފުނަމާ)، މިރޭ ޕްރޮގްރެސިވް ކޯލިޝަނުން ބާއްވާ ޖަލްސާގައި ބައިވެރިވެވަޑައިގެން ވާހަކަ ދައްކަވައިފިއެވެ.
ނިމިގެން ދިޔަ ރިޔާސީ އިންތިޚާބުގައި އިދިކޮޅު ކޯލިޝަނުގައި ހުންނެވި ލަތީފް ވަނީ ފަހުން ޖުމުހޫރީ ޕާޓީއާ ގުޅިވަޑައިގެންފައެވެ. އެއަށްފަހު ލަތީފް ވަނީ ކުރީގެ ނައިބު ރައީސް އަހުމަދު އަދީބު އިސްކޮށް ހުންނަވައި އުފެއްދި ތާޑްވޭ ޑިމޮކްރެޓްސްގެ ޖަލްސާއެއްގައި ވެސް ވާހަކަ ދައްކަވާފައެވެ.
މިރޭ އިދިކޮޅުން ބޭއްވި "ދަވާލައިފި" ޖަލްސާގައި ވާހަކަ ދައްކަމުން ލަތީފް ވަނީ މިސަރުކާރަށް ވަރަށް ބޮޑަށް ފާޑުކިޔާފައެވެ. ޚާއްސަކޮށް ރައީސް ސޯލިހާއި ފޮރިން މިނިސްޓަރ ޝާހިދަށް ފާޑުވިދާޅުވަމުން ސަރުކާރު ހިންގަނީ އަމާޒެއް ނެތި، ސަރުކާރު ހިންގަން ނުދަންނަ ބަޔެއް ކަމަށް ލަތީފް ވިދާޅުވެފައިވެއެވެ.
ކުރިއަށް އޮތް ލޯކަލް ކައުންސިލް އިންތިޚާބު ރައީސް ޔާމީނާއެކު އިދިކޮޅުން ކާމިޔާބު ކުރާނެ ކަމާމެދު ޝައްކެއް ނެތް ކަމަށް ބުނެ ޔާމީނަށް ވަރަށް ބޮޑަށް ތައުރީފް ކުރެއްވި ލަތީފް ވަނީ މީގެ އަހަރެއްހާ ދުވަސް ކުރިން އިދިކޮޅު ޖަލްސާތަކުގައި ޔާމީނަށް ވަރަށް ބޮޑަށް ފާޑުކިޔާފައެވެ.
އިދިކޮޅާއި ގުޅުނު 12 މެމްބަރުންނަށް ޔާމީން ކުރި އަނިޔާތަކުގެ ތަފްސީލް އެކި ފަހަރު މަތިން ކިޔާދީފައިވާ ލަތީފް މިހާރު ވަނީ އަނިޔާ ދެއްވި ކަމަށް ވިދާޅުވި ޔާމީނާއި ގުޅިވަޑައިގެންފައެވެ.