މޯލްޑިވްސް ނޭޝަނަލް ޑިފެންސް ފޯސް(އެމްއެންޑީއެފް) އާއި ޗައިނާގެ ނޭވީ ގުޅިގެން، ރާއްޖޭގެ އެކި ކަންކޮޅުތަކުގައި "މިޝަން ހާމަނީ 2013" ގެ ނަމުގައި ޞިއްޙީ ޚިދުމަތް ފޯރުކޮށް ދިނުމަށް ޗައިނާ ނޭވީގެ ހޮސްޕިޓަލް ޝިޕް "އާކް ޕީސް" މިއަދު ހެނދުނު ރާއްޖެ އަތުވެއްޖެ އެވެ.
މިއަދު ހެނދުނު މި ޝިޕް ރާއްޖެ އައުމުން މަރުޙަބާ ކިޔުމުގެ ގޮތުން މާލޭ ކޮމާޝަލް ހާބަރުގައި ވަނީ ޚާއްޞަ ރަސްމިއްޔާތެއް ބާއްވާފަ އެވެ.
މި ރަސްމިއްޔާތުގައި ރިއަ އެޑްމިރަލް ޝެން ހާއޯ އަށް މާލެއިން މަރުޙަބާ ދެންނެވީ ބްރިގޭޑިއަ ޖެނެރަލް ޢަބްދުﷲ ޝަމާލް އެވެ. ވަރަށް ކުލަގަދަކޮށް ބޭއްވުނު މި ރަސްމިއްޔާތުގައި ސްކޫލް ކުދިންތަކެއް ވަނީ ޑާންސް އައިޓަމެއް ވެސް ހުށަހަޅައި ދީފަ އެވެ. އަދި އެމްއެންޑީއެފްގެ ޖެނެރަލް އޮފިސަރުންނާ އޮފިސަރުން ވަނީ މި ޝިޕަށް އަރާވަޑައިގެން މި ޝިޕް ބައްލަވާލައްވާފަ އެވެ.
ޗައިނާ ނޭވީ ހޮސްޕިޓަލް ޝިޕްގެ ރިއަ އެޑްމިރަލް އަދި "މިޝަން ހާމަނީ 2013" ގެ މިޝަން ކޮމާންޑަރު ވަނީ މި ރަސްމިއްޔާތަށް ފަހު މީޑިއާ އާ ބައްދަލުކު ރައްވާ ވާހަކަފުޅު ދައްކަވާފަ އެވެ.
މިޝަން ކޮމާންޑަރުގެ ވާހަކަފުޅުގައި، މިއީ ޗައިނާ އާއި ރާއް ޖެއާ ދެމެދުގައި އަދި ދެ ޤައުމުގެ އަސްކަރިއްޔާގެ ދެމެދުގައި ވަރަށް ތާރީޚީ ދުވަހެއް ކަމަށް ވިދާޅުވި އެވެ. އަދި "އާކް ޕީސް" އަށް ރާއްޖޭން ދެންނެވި ހޫނުގަދަ މަރުޙަބާ ފާހަގަ ކުރައްވައި، ކުޑަކުދިން ހުށަހަޅައި ދިން ޑާންސް އައިޓަމް ވަނީ ވަކިން ޚާއްޞަކޮށް ފާހަގަ ކުރައްވާފަ އެވެ.
އިތުރަށް ވާހަކަފުޅު ދައްކަވަމުން، "މިޝަން ހާމަނީ 2013" ދިވެހި ރާއްޖޭގައި ބޭއްވުމުގެ ފުރުޞަތު ފަހިކޮށް ދެއްވިކަމަށްޓަކައި ދިވެހި ސަރުކާރަށާއި ދިވެހި އަސްކަރިއްޔާ މިޝަން ކޮމާންޑަރު ރިއަ އެޑްމިރަލް ޝުކުރު އަދާ ކުރެއްވި އެވެ.
މި ދަތުރުގައި ރާއްޖޭގެ ރައްޔިތުންނަށް މި ހޮސްޕިޓަލް ޝިޕުން ފޯރުކޮށް ދެވެން ހުރި އެންމެ ފުރިހަމަ ސިއްޙީ ފަރުވާ ފޯރުކޮށް ދެއްވާނެކަމުގެ ޔަޤީން ދެއްވި އެވެ.
އަދި މި ދަތުރަކީ ކާމިޔާބު ދަތުރަކަށް ވާނެ ކަމަށް އުއްމީދު ކުރައްވާ ކަމަށާއި، މި ދަތުރުގެ ސަބަބުން ދެ ޤައުމުގެ އަސްކަރިއްޔާގެ ގުޅުން މިހާރަށް ވުރެ ބަދަހިވެގެން ދާނެ ކަމަށް އުއްމީދު ކުރައްވާ ކަމަށް ވެސް މިޝަން ކޮމާންޑަރު ވިދާޅުވި އެވެ.
ދިވެހި ރާއްޖޭގެ ރައްޔިތުންނަށް ސިއްޙީ ފަރުވާ ޚިދުމަތް ހިލޭ ސާބަހަށް ފޯރުކޮށްދިނުމަށް މިއަދު ރާއްޖެ އައިސްފައި މިވާ ޗައިނާ ނޭވީ ހޮސްޕިޓަލް ޝިޕް "އާކް ޕީސް" މިއަދުން ފެށިގެން ޖުލައި މަހުގެ 5 ވަނަ ދުވަހުގެ ނިޔަލަށް ރާއްޖޭގެ އެކި ހިސާބުތަކުގައި ސިއްޙީ ޚިދުމަތް ފޯރިކޮށް ދިނުމަށް ވަނީ ހަމަޖެހިފަ އެވެ.
މިމެޑިކަލް ހޮސްޕިޓަލް ޝިޕްގެ ޑޮކްޓަރުންގެ ޓީމްތަކުން ރާއްޖޭގެ 8 ސަރަޙައްދެއްގައި ސިއްޙީ ފަރުވާގެ ޚިދުމަތް ފޯރުކޮށްދޭނެއެވެ. އެއީ، ކ. ގުރައިދޫ، އއ. ރަސްދޫ، އދ. މަހިބަދޫ، ހދ. ކުޅުދުއްފުށި، ޏ. ފުވައްމުލައް، އައްޑޫ ސިޓީ، ބ. އޭދަފުށި، ގއ. ވިލިނގިލި އަދި މާލޭގައި ސެނަހިޔާ ހޮސްޕިޓަލްގަ އެވެ.
އަދި މީގެ އިތުރުން، ކ. ގުރައިދޫގައި ޤާއިމް ކުރެވިފައިވާ ޚާޢްޞަ އެހީއަށް ބޭނުންވާ މީހުންގެ މަރުކަޒަށް ގޮސް ސިއްޙީ ފަރުވާގެ ޚިދުމަތް ފޯރުކޮށް ދިނުމުގެ އިތުރުން، ކުޑަކުދިންގެ ހިޔާއަށް ޒިޔާރަތްކޮށް ސިއްޙީ ފަރުވާގެ ޚިދުމަތް ދިނުމަށް ވެސް ވަނީ ހަމަޖެހިފަ އެވެ.
މި ޝިޕްގެ މެޑިކަލް ޚިދުމަތް ހޯއްދެވުމަށް ބޭނުންފުޅުވާ ފަރާތްތަކުން ހަމަޖެހިފައިވާ އުޞޫލުގެ މަތިން ނަން ނޯޓް ކުރައްވައިގެން ޑޮކްޓަރަށް ދެއްކެވުމުގެ ކަންތައްތައް ހަމަޖެއްސެވުމަށް އެމްއެންޑީއެފް މެޑިކަލް ސަވިސް އިން އިލްތިމާސް ކުރައްވަ އެވެ.
އެގޮތުން އަށް ސަރަޙައްދުގައި ސިއްޚީ ފަރުވާގެ ޚިދުމަތް ދިނުމަށް ހަމަޖެހިފައިވާ އިރު، ކޮންމެ ސަރަޙައްދަކުން ވެސް ނަން ނޯޓް ކުރެއްވުމަށް ވަނީ ވަކި ނަމްބަރެއް ޚާއްޞަ ކުރެވިފަ އެވެ.
އެގޮތުން، ކ. ގުރައިދޫ 9798183، އއ. ރަސްދޫ 6660645، އދ. މަހިބަދޫ 6680529، ހދ. ކުޅުދުއްފުށި 6528864، ޏ. ފުވައްމުލައް 6860658، އައްޑޫ ސިޓީ 6888672، ބ. އޭދަފުށި 6608309، ގއ. ވިލިނގިލި 6820034 އަދި ސެނަހިޔާ 3322595/ 3313915 އެވެ.