އައްޑޫ ސިޓީގެ ގުޅިފައިވާ ރަށްތަކަށް ކަރަންޓުގެ ޚިދުމަތްދޭ މަރުކަޒީ އިންޖީނުގޭގެ ކޭބަލް ނެޓްވޯކަކަށް މިދިޔަ އާދީއްތަ ދުވަހު ދިމާވި މައްސަލަ ހައްލުކުރުމަށް މިއަދު ހެނދުނު 9:00 އިން ފެށިގެން ފެނަކަ އިން ކުރި މަސައްކަތް 12:50 ގައި ނިންމާ، ބޮޑު ބަޔަކަށް ކަރަންޓު ދީފިއެވެ.
ފެނަކައިން ކުރިން އިއުލާން ކޮށްފައިވަނީ މައްސަލަ ހައްލު ކުރުމަށް ހެނދުނު 9:00 އިން ހަވީރު 4:00 އަށް ކަރަންޓު ކަނޑާނެ ކަމަށާއި ނަމަވެސް އެއަށްވުރެ އަވަހަށް މައްސަލަ ހައްލު ކުރެވިއްޖެނަމަ ކަރަންޓު ދެވޭނެ ކަމަށެވެ.
ފެނަކައިން މައުލޫމާތުދޭ ގޮތުގައި މައްސަލަ ހައްލުކުރުމަށް ކުރި މަސައްކަތް މިހާރު ވަނީ ކާމިޔާބު ކަމާއެކު ނިންމާލެވިފައި ކަމަށެވެ. އަދި މިހާރު އައްޑޫގެ ހުރިހާ ހިސާބަކަށް ކަރަންޓު ދިނުމުގެ މަސައްކަތް ކުރަމުން އަންނަ ކަމަށާއި ބޮޑު ބަޔަކަށް ކަރަންޓު ދެވިފައިވާ ކަމަށް ބުނެފައިވެއެވެ.