ރޭ ތޫނު އެއްޗަކުން ބިދޭސީއަކަށް ހަމަލާ ދީ ޒަހަމްކޮށްލި މައްސަލަ އާ ގުޅިގެން، އެކަން ކުރި ކަމަށް ތުހުމަތު ކުރެވޭ މީހާ ހޯދަމުން އަންނަ ކަމަށް ފުލުހުން ބުނެފި އެވެ.
ރޭ ހިނގި ހާދިސާގައި އަނިޔާ ލިބިފައި ވަނީ ބަނގުލަދޭޝްގެ ރައްޔިތެއް ކަމަށްވާ ޢުމުރުން 26 އަހަރުގެ ފިރިހެނަކަށެވެ.
ފުލުހުން ބުނީ ރޭ 10:50 އެހާކަށްހާ އިރު ހިތަދޫ ލިންކު ރޯޑުގައި ހުރި ރެސްޓޯރެންޓެއްގެ ކުރިމަތީގައި ތޫނު އެއްޗަކުން ދިން ޙަމަލާގައި ބިދޭސީ މީހާގެ ބުރަކަށިން ދެ ތަނެއް ޒަޚަމްވެފައިވާ ކަމަށެވެ.
މަންޒަރު ދުށް މީހަކު ރޭ ބުނީ ބިދޭސީ މީހާ ޑިއުޓީ އަށް ދަނިކޮށް އޭނާގެ ފުރަގަހުން އައި ބަޔަކު އޭނާ އަށް ހަމަލާ ދިނި ކަމަށެވެ.
އަދި އޭނާ އަށް ހިތަދޫ ރީޖަނަލް ހޮސްޕިޓަލުން ފަރުވާ ދިނުމަށް ފަހު މިއަދު ހެނދުނުގެ ވަގުތެއްގައި ދޫކޮށްލާފައިވާ ކަމަށް ފުލުހުން ބުންޏެވެ.