ސައުދީ އަރަބިއްޔާގެ ތެޔޮ އުފައްދާ ދެ ތަނަކަށް ރޭ ދިން ޑްރޯން ހަމަލާއަކަށް ފަހު ތެޔޮ އުފެއްދުން ދެބައިކުޅަ އެއްބަޔަށް މަދުކޮށްފިއެވެ. މިއާއެކު ދުނިޔޭގެ ބާޒާރުގައި ތެލުގެ އަގުވެސް ވަނީ އުފުލިފައެވެ.
މިހަމަލާއާ ގުޅިގެން އެގައުމުގެ ހަކަތައާ ބެހޭ ވަޒީރު ޕްރިންސް އަބްދުލްއަޒީޒް ބިން ސަލްމާން ވިދާޅުވީ ތެޔޮ އުފެއްދުން ދުވާލަކަށް 5.7 މިލިއަން ފީފާއަށް މަދުކޮށްފައިވާ ކަމަށެވެ.
ޔަމަނުގެ ހޫތީން ވަނީ ސައުދީ ތެޔޮ އުފެއްދުން ހުއްޓުވުމަށް 10 ޑްރޯން ފޮނުވިކަން އިއުލާން ކޮށްފައެވެ. ނަމަވެސް އެމެރިކާއިން ތުހުމަތު ކުރަނީ މިހަމަލާގެ ފަހަތުގައި ވަނީ އިރާން ކަމަށެވެ. ސްޓޭޓް ސެކެޓްރީ މައިކް ޕޮމްޕެއޯ ވިދާޅުވީ މިއީ ހޫތީންގެ ހަމަލާއެއް ކަމަށް ބުރަވެވޭކަށް ނެތް ކަމަށާއި އެކަމުގެ އެއްވެސް ހެއްކެއް ނެތް ކަމަށެވެ.
ސަރުކާރު ހިއްސާވާ ތެޔޮ ކުންފުނި އަރަމްކޯގެ ރައީސް އަމިން ނަސީރް ބުނެފައިވަނީ މިހާދިސާގައި އެއްވެސް މީހަކަށް އަނިޔާވެފައި ނުވާ ކަމަށެވެ. އަދި މިހާރު އަލިފާންގަނޑު ކޮންޓްރޯލް ކުރެވިފައިވާ ކަމަށާއި ނަމަވެސް ހާދިސާއާ ގުޅިގެން ލިބުނު ގެއްލުމާ ގުޅޭގޮތުން އެއްޗެއް ދަންނަވަން އަދި ނޭނގޭ ކަމަށެވެ.
އެހެންކަމުން މިއީ އިރާނުން ކުރި ކަމެއް ކަމަށް އެމެރިކާގެ ރައީސް ޑޮނަލްޑް ޓްރަމްޕް ވެސް ވަނީ ވިދާޅުވެފައެވެ.
ޔަމަނުގައި އުފެދިފައިވާ ދާޚިލީ ހަނގުރާމާގައި ސައުދީން އެރީ ސަރުކާރާ އެއްކޮޅަށެވެ. ނަމަވެސް އިރާން އޮތީ ހޫތީންނާ ބައިއަތު ހަދާފައެވެ. އެމެރިކާއިން ވަނީ އިރާނާ ދެކޮޅަށް ދާދި ފަހުން ނިއުކްލިއާ ހަކަތައިން ވެސް ދަތިކުރުމުގެ ފިޔަވަޅު އަޅާފައެވެ.