ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދާއި، ރައީސުލް ޖުމުހޫރިއްޔާ އިބްރާހިމް މުހައްމަދު ސޯލިހާ ދެމެދު މައްސަލަ ޖެހިފައިވާ ކަން ގައުމާ މެދު ވިސްނާ ބަޔަކަށް ސާފުވާނެ ކަމަށް ސަރުކާރު ކޯލިޝަނުގައި ހިމެނޭ ޖުމުހޫރީ ޕާޓީގެ ލީޑަރ ގާސިމް އިބްރާހިމް ވިދާޅުވެއްޖެއެވެ.
ޖޭޕީއާ އަލަށް ގުޅުނު މެމްބަރުން ގުޅުމުގެ އުފަލުގައި ބޭއްވި ޖަލްސާގައި ވާހަކަ ދައްކަވަމުން ގާސިމް ވިދާޅުވީ، ރައީސް ނަޝީދު ދައްކަވާ ވާހަކަތަކުން ފެންނަަނީ ރައީސުލް ޖުމުހޫރިއްޔާ ގައިކޮޅުގައި ޖައްސަވާ މަންޒަރު ކަމަށެވެ. ނަޝީދަށް ވަރަށް ބޮޑަށް ފާޑުވިދާޅުވެ ގާސިމް ވާހަކަ ދައްކަވާފައިވާއިރު ރައީސް ސޯލިހް ވަނީ ދިފާއު ކޮށްފައެވެ.
ގާސިމް ވިދާޅުވީ މިހާރުގެ ރައީސުލް ޖުމުހޫރިއްޔާއަކީ ހަމަނުޖެހުމަށް، ފަސާދައަށް ޖާގަ ދެއްވާނެ ބޭފުޅެއް ނޫން ކަމަށެވެ. އެމަނިކުފާނު، ގާނޫނާއި ޚިލާފަށް ކުރެއްވި ކަމެއް، ވިދާޅުވި ބަސްފުޅެއް ނޯންނާނެ ކަމަށާއި ރައީސް ސޯލިހަކީ ސުލްހަ މަސަލަސް ކަމާއި ހަމަޖެހުމަށް ލޯބި ކުރައްވާ ލީޑަރެއް ކަމަށް ގާސިމް ވިދާޅުވިއެވެ.
ގައުމު ކުރިއަރައި ކަންކަން އިސްލާހު ވަމުންދާ ދަނޑިވަޅެއްގައި ގައުމު އަނދަވަޅަކަށް ވައްޓާލަން މަސައްކަތް ކުރައްވަނީ ކީއްވެތޯ، މުޅި ޖަލްސާގައި ވެސް ނަޝީދަށް އަމާޒުކޮށް ފާޑުވިދާޅުވި ގާސިމް ވަނީ ސުވާލުކުރައްވާފައެވެ.
ގާސިމް ވަނީ ޖަލްސާތަކުގައި ދީނީ ގޮތުން ނަޝީދު ދައްކަވާ ވާހަކަފުޅުތަކަށް ވެސް ފާޑުވިދާޅުވެފައެވެ. އެފަދަ ވާހަކަތަކުން ގައުމުގައި ނަފްރަތާއި ފަސާދަ އާންމުވުމަށް ފުރުސަތު އެބަ އޮތް ކަމަށާއި، އެމަނިކުފާނު އެފަދަ ވާހަކަ ދެއްކުމުން ލިބޭ ފައިދާއެއް ނެތްއިރު ލިބޭ ގެއްލުން މާ ބޮޑު ކަމަށް ގާސިމް ވިދާޅުވިއެވެ.
ޣިޔާސުއްދީން ސްކޫލުގެ ޓޮޕް އެޗީވާސް އެވޯޑު ދިނުމުގެ ޖަލްސާގައި ރާއްޖޭގައި ޒަމާނުއްސުރެ އަންހެނުން ހެދުން އަޅަމުން އައި ގޮތާ ގުޅޭގޮތުން ރައީސް ނަޝީދު ދެއްކެވި ވާހަކަފުޅަކީ އެމަނިކުފާނު އަމިއްލަ ގޯލަށް ބައިކޮޅަށް ޖެއްސެވި ގޯލެއްގެ ގޮތުގައި ސިފަ ކުރައްވައި އެކަން ނުކުރެއްވުމަށް ގާސިމް ވަނީ ގޮވާލާފައެވެ.