މިއަދު މަރަދޫ ލިންކު ރޯޑުގައި ހިނގި ނުރައްކާތެރި އެކްސިޑެންޓަށް ފަހު ދެވަނަ ސައިކަލުގައި ތިބި މީހުން އެސަރަހައްދުން ފިލުމަށް ފަހު ލިބުނު އަނިޔާތަކަށް ފަރުވާ ހޯދަން ހޮސްޕިޓަލަށް ދިއުމުން ފުލުހުން އަތުލައިގެންފިއެވެ.
ފުލުހުން މައުލޫމާތު ދީފައިވާ ގޮތުގައި ސައިކަލު ދުއްވަން ހުރީ 17 އަހަރުގެ ކުޑަ ކުއްޖެއް ކަމަށެވެ. އަދި އޭނާގެ އަތުގައި ލައިސެންސެއް ވެސް ނެތް އިރު ހޮސްޕިޓަލަށް ފަރުވާ ހޯދަން ދިއުމުން މިހާރު ވަނީ ފުލުހުންގެ ބެލުމުގެ ދަށުގައެވެ.
ނަމަވެސް އޭނާއަށް ވެސް ހޮސްޕިޓަލުގައި ފަރުވާ ދެވެމުންދާ ކަމަށް ފުލުހުން މައުލޫމާތު ދީފައިވެއެވެ. މިހާދިސާގައި ބޮޑަށް އަނިޔާވެފައިވަނީ އުމުރުން 55 އަހަރުގެ މީހަކަށެވެ. އޭނާގެ ބޮލަށް ވަރަށް ބޮޑަށް އަނިޔާވެފައިވާއިރު ހޮސްޕިޓަލުން މައުލޫމާތުދޭ ގޮތުގައި މިހާރު ފަރުވާ ދެމުންދަނީ އައިސީޔޫގައެވެ.