ޢާންމު ރައްޔިތުންނާ ގުޅިގެން މަސައްކަތް ކުރުމަށް އެހީވެދޭ ކްރައިމް ޕްރިވެންޝަން ކޮމިޓީ އެކުލަވާލުމާއި އެ ކޮމިޓީ ހިންގާނެ ގޮތުގެ ޤަވާއިދު "ކްރައިމް ޕްރިވެންޝަން ކޮމިޓީ ޤަވާއިދު" އަށް ޢާންމުންގެ ޚިޔާލު ހުށަހެޅުމަށް ފުރުޞަތު ހުޅުވާލައިފި އެވެ.
މި ޤަވާޢިދަށް ޢާއްމު ރައްޔިތުންގެ ޚިޔާލު ހުށަހެޅުމަށް ފުރުޞަތު ހުޅުވާލާފައި މި ވަނީ ފުލުހުންގެ ޚިދުމަތަކީ ރައްޔިތުންނާ ގުޅިގެން ރައްޔިތުންގެ ސަލާމަތާއި ރައްކާތެރިކަން ކަށަވަރުކޮށް ދިނުމަށް ހިންގޭ ޚިދުމަތަކަށްވެފައި ކްރައިމް ޕްރިވެންޝަން ކޮމިޓީތަކުގެ މަސައްކަތަކީ ރައްޔިތުންގެ ސީދާ ބައިވެރިވުން އޭގައި ވަރަށް ބޮޑަށް ހިމެނޭ ކޮމިޓީއަކަށް ވާތީ ކަމަަށް ފުލުހުން ބުންޏެވެ.
މީގެ އިތުރުން މިފަދަ ކޮމިޓީތަކުގެ މަސައްކަތް އެންމެ އެދެވޭ ގޮތެއްގައި ކުރިޔަށް ގެންދެވޭނީ ރައްޔިތުންގެ ޚިޔާލާއި މަޝްވަރާ ލިބިގެން ކަމަށްވާތީ ކަމަށް ވެސް ފުލުހުން ބުނެ އެވެ.
މޯލްޑިވްސް ޕޮލިސް ސަވިސްގެ އެގްޒެކެޓިވް ބޯޑުގެ ނިންމުމާއެކު މިޤަވާޢިދަށް ޢާއްމު ރައްޔިތުންގެ ޚިޔާލު ހުށަހެޅުމުގެ ފުރުޞަތު މިއަދުން ފެށިގެން ވަނީ ހުޅުވާލާފައެވެ. މި ޤަވާއިދަށް ޚިޔާލު ހުށަހެޅުމުގެ ސުންގަޑިއަކީ 2013 ޖުލައި 07 ވާ އާދިއްތަ ދުވަހުގެ ނިޔަލަށެވެ.
މި ޤަވާއިދަށް ޚިޔާލު ހުށައެޅުއްވުމަށް ފޯނުން ނަމަ ގުޅުއްވާނީ 3322111 އަށެވެ. ފެކްސް ކުރައްވާ ނަމަ ފެކްސް ކުރާނީ 3318036 / 3332827 އަށެވެ. އީމެއިލް ކުރައްވާ ނަމަ ކުރައްވާނީ sdd.spu@police.gov.mv އަށެވެ.
"ކްރައިމް ޕްރިވެންޝަން ކޮމިޓީ ގަވާއިދު" ފުލުހުންގެ ވެބްސައިޓުން މިހާރު ބެލެން ހުންނާނެ އެވެ.