ހުކުރު ދުވަހު ދުނިޔޭގެ އެކި ކަންކޮޅުތަކުގައި މޫސުމަށް އަންނަ ބަދަލުތަކާ ގުޅިގެން ދުނިޔެ ތެދުވުމަށް ސްކޫލް ކުދިން އިސް ނަގައިގެން ބާއްވާ މޫސުމީ ހަޅުތާލު އައްޑޫގައި ވެސް ކުރިއަށް ގެންދަން ނިންމައިފިއެވެ.
މާލޭގެ އިތުރުން ފުވައްމުލަކާއި އައްޑޫގައި ކުރިއަށް ގެންދާ މި ހަޅުތާލު އައްޑޫގައި އޮންނާނީ މަރަދޫ ފަތާ ޓްރެކު ސަރަހައްދުގައެވެ. އައްޑޫގެ މަދަނީ ޖަމިއްޔާތައް އިސް ނަގައިގެން ބާއްވާ މިހަޅުތާލުގައި މޫސުމަށް އަންނަ ބަދަލުތަކާ ގުޅިގެން ސަރުކާރުން ކުރާ މަސައްކަތް އިތުރުކުރުމަށް ގޮވާލައި އަޑު އުފުލުމަށް ހަމަޖެހިފައިވެއެވެ.
މުޅި ދުނިޔޭގައި ވެސް މިއަދު ކުރާ މިހަޅުތާލުގައި ދުނިޔޭގެ ލީޑަރުން މޫސުމީ ބަދަލުތަކަށް އިހުމާލުވުމުގެ ބަދަލުގައި ދުނިޔެ ސަލާމަތް ކުރުމަށް އަޅާ ފިޔަވަޅުތައް ޕެރިސް އެގްރީމެންޓާ އެއްގޮތަށް އެޅުމަށް ގޮވާލާނެއެވެ.
މި ހަޅުތާލަކީ އުމުރުން 16 އަހަރުގެ ގްރެޓާ ތަންބާގް އިސް ނަގައިގެން ބާއްވާ ހަޅުތާލެކެވެ. ހަރަކާތަށް ދުނިޔޭގެ އެކި ކަންކޮޅުތަކުން އެތައް ސަތޭކަ މިލިއަން މީހުންގެ ތާއީދު ލިބިފައިވާއިރު މިހާރުވެސް ބައެއް ހިސާބުތަކުގައި ހަޅުތާލު ކުރިއަށް އެބަދެއެވެ.
ރާއްޖޭގައި ހަޅުތާލު އޮންނާނީ ހަވީރު 5:00 އިން 6:00 އަށެވެ.