ރާއްޖޭގެ ތާރީޚުގައި ވެސް ރައްޔިތުންގެ މަޖިލީހަކަށް އޭރެއްގައި އޮންނަ ސަރުކާރަކުން އެއްބާރުލުން ނުދޭ ވަރަށް މިސަރުކާރުން އެއްބާރުލުން ދީފައިވާނެ ކަމަށް ރައީސުލް ޖުމުހޫރިއްޔާ އިބްރާހިމް މުހައްމަދު ސޯލިހް ވިދާޅުވެއްޖެއެވެ.
ރައީސް މިހެން ވިދާޅުވެފައިވަނީ މިއަދު ބޭއްވި ނޫސްވެރިންގެ ބައްދަލުވުމެއްގައި، ނޫސްވެރިޔަކު ކުރި ސުވާލަކަށް ޖަވާބު ދެއްވަމުންނެވެ. ރައްޔިތުންގެ މަޖިލީހުގެ ރައީސް މުހައްމަދު ނަޝީދު، މިސަރުކާރުގެ ސްޕީޑާ ގުޅޭގޮތުން ދެއްކެވި ވާހަކަ ގަބޫލުކުރައްވާތޯ އެއްސެވުމުން ރައީސް ވިދާޅުވީ މަޖިލީހާއި ރައީސް އޮފީހުގެ މަސައްކަތަކީ ވަރަށް ތަފާތު މަސައްކަތް ކަމަށެވެ.
ކުރީގެ މަޖިލީހުގެ މަސައްކަތާއި މިހާރުގެ މަޖިލީހުގެ މަސައްކަތް އަޅާ ބަލާއިރު މިހާރު މަޖިލީހުން ކުރާ މަސައްކަތް މާ ގިނަ، އަދި ބުރަ ކަމަށާއި ނަމަވެސް ސަރުކާރުން މަޖިލީހަށް އެއްބާރުލުން ނުދީގެން ޝަކުވާ ކުރެވޭނެ ޖާގައެއް ނެތް ކަމަށް ރައީސް ފާހަގަކުރެއްވިއެވެ.
ދައުލަތުގެ ވަޒީރުން، ސަރުކާރުގެ މުއައްސަސާތަކުގެ ވެރިން، 19 ވަނަ ރައްޔިތުންގެ މަޖިލީހަށް އެއްބާރުލުން ނުދޭން ކުރި އެއްވެސް ކަމެއް ނެތް ކަމަށާއި، ހުރިހާ ވަޒީރުން ވެސް ހާޒިރުކުރުމުން ހާޒިރުވެ ޖަވާބު ދެއްވައި އެއްބާރުލުން ދެއްވި ކަމަށް ރައީސް ސޯލިހް ވިދާޅުވިއެވެ.