ރައީސް މުހައްމަދު ނަޝީދާއި ދެމެދު އެއްވެސް މައްސަލައެއް ނެތް ކަމަށް ރައީސުލް ޖުމުހޫރިއްޔާ އިބްރާހިމް މުހައްމަދު ސޯލިހް ވިދާޅުވެއްޖެއެވެ.
ރައީސް އޮފީހުގައި މިއަދު ރައީސް ސޯލިހް ބޭއްވި ނޫސްވެރިންގެ ބައްދަލުވުމެއްގައި ނޫސްވެރިޔަކު ކުރި ސުވާލަކަށް ޖަވާބު ދެއްވަމުން ވިދާޅުވީ، ބައެއް ފަރާތްތަކުން ޚަގީގަތާ ޚިލާފު ވާހަކަތަކެއް ފަތުރަމުންދާ ކަމަށާއި، މިއަދުވެސް ނަޝީދާއި ދެބޭފުޅުން ބައެއް ކަންތައްތަކާ ގުޅޭގޮތުން މަޝްވަރާ ކުރެއްވި ކަމަށެވެ.
ޚިޔާލު ތަފާތުވުމެއް އަދި މައްސަލައެއް ދެބޭފުޅުންގެ ދެމެދުގައި ދިމާވާނެ ދުވަހެއް ނާންނާނެ ކަމަށް ރައީސް ސޯލިހް ވިދާޅުވެފައިވާއިރު ފަހަކަށް އައިސް ދެ ލީޑަރުންގެ ދެމެދުގައި ޚިޔާލު ތަފާތުވުންތަކެއް އޮތްކަން ވަނީ ފާހަގަކުރެވިފައެވެ.
ރައީސް ވަނީ މިއަދުގެ ނޫސް ކޮންފަރެންސުގައި ޚިޔާލު ތަފާތުވުންތަކަކީ މައްސަލައެއް ނޫން ކަމަށާއި، މަޝްވަރާކޮށްގެން ހައްލުކުރުމަކީ އެންމެ ރަނގަޅު ގޮތް ކަމަށް ވިދާޅުވެފައެވެ.