ކުރީ ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން ރާއްޖޭގެ އެކި ކަންކޮޅުތަކުގައި ހައުސިން ޔުނިޓު އަޅާފައި ހުރީ ރަނގަޅު ޕްލޭންތަކެއް ހެދިގެން ނޫން ކަމަށް ރައީސް އިބްރާހިމް މުހައްމަދު ސޯލިހް ވިދާޅުވެއްޖެއެވެ.
ޔާމީންގެ ސަރުކާރުން 5،000 އަށްވުރެ ގިނަ ހައުސިން ޔުނިޓް އެކި ހިސާބުތަކުގައި އަޅާފައިވާއިރު މާލޭގައި އެކަނިވެސް 4،000 އަށްވުރެ ގިނަ ހައުސިން ޔުނިޓް އެޅިކަން ރައީސް ފާހަގަކުރެއްވިއެވެ.
އެ ހައުސިން ޔުނިޓުތަކަކީ އެއްފަހަރާ ފައިސާ ދެއްކުމަށް ފަހު ގަނެވޭ ހައުސިން ޔުނިޓްތައް ކަމަށާއި އޭގެ ޔުނިޓެއްގެ އަގު 2 މިލިއަން ރުފިޔާއަށް ވުރެ ބޮޑު ކަން ރައީސް ސޯލިހް ފާހަގަކުރެއްވިއެވެ. "އަޅުގަނޑުމެންގެ ތެރޭގައި ކޮންމެ މީހަކީ މިއަގު ދީފައި ހައުސިން ޔުނިޓެއް ގަނެވޭނެ މީހެއް ނޫން. 1000 އަށްވުރެ މަދުވާނެ އެފައިސާ ހުރި މީހުން. 7000 ޔުނިޓް ވިއްކަން އެބަ ޖެހޭ. ބޭންކުގަ އެހާ ފައިސާއެއް ވެސް ނެތް،" ރައީސް ވިދާޅުވިއެވެ.
ރައީސް ސޯލިހް ވިދާޅުވީ މިހުރިހާ ހައުސިން ޔުނިޓަކަށް 16 ބިލިއަން ރުފިޔާ އަރާނެ ކަމަށާއި، ބޭންކް އޮފް މޯލްޑިވްސް އިން ބުނަނީ ބޭންކުގައި ހުރީވެސް 4 ބިލިއަން ރުފިޔާ ކަމަށެވެ. އެހެންކަމުން މިއީ ކުރީ ސަރުކާރުން ކޮށްފައިވާ ދެކޮޅު ނުޖެހޭ ކަމެއް ކަމަށް ރައީސް ވިދާޅުވިއެވެ.
ސަރުކާރުން ބަލަނީ ރައްޔިތުންނަށް ވީހާވެސް ލުއި ގޮތަކަށް ބޯހިޔާވަހިކަން ލިބުން ކަމަށާއި މިސަރުކާރުން މަސައްކަތް ކުރާނީ އެއަމާޒަށް ވާސިލު ވުމަށް ކަމަށް ރައީސް ވިދާޅުވިއެވެ.