ވެރިކަންކުރާ މާލެ ތަރައްގީކޮށް ހުރިހާ ވަސީލަތެއް ލިބެން ހުރި ތަނަކަށް މާލެ ހަދައި، މާލެ ތޮއްޖެއްސުމުގެ ދިގު ފަންސާސް އަހަރުގެ ސިޔާސަތު ފެއިލްވެއްޖެކަން ގަބޫލުކޮށް އެސިޔާސަތަށް ނިމުމެއް ގެނެސް އަތޮޅުތައް ތަރައްގީކޮށް އަތޮޅުތެރޭގެ ރައްޔިތުން އަނބުރާ ރަށްތަކަށް ފޮނުވާ ދިނުމަށް ކެންދޫ ދާއިރާގެ މެމްބަރު އަލީ ހުސެއިން ގޮވާލައިފިއެވެ.
ރޭ މާލޭ ގުދަނެއްގައި ހިނގި ނުރައްކާތެރި އަލިފާނުގެ ހާދިސާއާ ގުޅިގެން މީހެއްގެ ފުރާނަ ގެއްލި، އަގުނުކުރެވޭހާ ބޮޑު ގެއްލުމެއް އެތައް އާއިލާއަކަށް ލިބިފައިވާ މިދަނޑިވަޅުގައި އަލީ މާލެއަށް ވުރެ ރަނގަޅު ގޮތެއް ދިވެހިންނަށް ހައްގު ކަމަށާއި ސަރުކާރުން އެކަން ކޮށްދިނުމަށް އެދިވަޑައިގެންފައެވެ.
ރޭގެ އަލިފާންގަޑު ރޯވެފައިވަނީ ކެމިކަލް ރައްކާކޮށްފައި ހުރި ގުދަނެއްގައި ރޯވެ ކައިރި އިމާރާތްތަކުގައި ރޯވެގެންނެވެ. އެގޮތުން 4 ކެމިކަލް ގުދަން އަނދާފައިވާއިރު 6 ގެއެއް ވެސް ވަނީ އަނދާފައެވެ. ގޭގެ މީހުން މިހާރު އުޅެމުންދަނީ ވަގުތީ ހިޔާތަކުގައެވެ. އާންމުންގެ މީހުން ވީވަރަކުން އެހީވެ އާއިލާތަކަށް ބޯހިޔާވަހިކަން ފޯރުކޮށްދެމުން އަންނައިރު ރޭ ރައީސުލް ޖުމުހޫރިއްޔާ ވަނީ ކެބިނެޓްގެ ކުއްލި ޖަލްސާއެއް ބާއްވައި ސަރުކާރު ވުޒާރާތަކާއި މަދަނީ ޖަމިއްޔާތަކުގެ އެހީތެރިކަން ހާލުގައި ޖެހުނު މީހުންނަށް ލިބޭނެ ކަމަށް ވިދާޅުވެފައެވެ.