ރޭ މާލޭގައި ހިނގި ހިތާމަވެރި އަލިފާނުގެ ހާދިސާގައި ދުނިޔެއާއި އަލްވަދާއު ކިޔާފައިވާ އާއިޝަތު ޝައުނާގެ ކަށު ނަމާދު މިއަދު މެންދުރު ނަމާދަށް ފަހު އިސްލާމީ މަރުކަޒުގައި އޮންނާނެއެވެ.
ޝައުނާގެ މޫނު ދެއްކުން 10.30 އިން ފެށިގެން ކުރިއަށްދިޔަ ނަމަވެސް މޫނު ދެއްކުން ހުޅުވާލީ ގާތް ތިމާގެ މީހުންނަށާއި އެކުވެރިންނަށް އެކަންޏެވެ.
އަލިފާންގަނޑު އެންމެ ބޮޑަށް ހިފި އެއް ގޭގައި ޝައުނާ ތާށިވުމުން ގާތް މީހުންނަށް ގުޅާ، ހެޔޮ ދުއާ ކޮށްދިނުމަށް އެދުނު ކަމަށް ބައެއް މީޑިޔާތަކުން ރިޕޯޓުކޮށްފައިވެއެވެ. އެމްއެންޑީއެފް ފަޔާ އެންޑް ރެސްކިއު އިން ބުނެފައިވަނީ ޝައުނާ ހޯދުމަށް ވަރަށް މަސައްކަތް ކުރި ކަމަށާއި ނަމަވެސް ފެނުނީ މާ ލަސްވެފައިވަނިކޮށް ކަމަށެވެ.
ރޭގެ އަލިފާނުގެ ހާދިސާގައި 4 ގުދަނަކާއި 6 ގެއެއް ވަނީ ރޯވެ ހުލިވެފައެވެ. 400 މީހަކު ގެދޮރު ގެއްލި ހާލުގައި ޖެހިފައިވާއިރު މާލޭގެ ރައްޔިތުންނާއި ވިޔަފާރިވެރިންގެ ދީލަތި އެހީގެ ސަބަބުން ހުރިހާ މީހުން ވެސް ވަނީ ޒަރޫރީ ބޭނުންތައް ކަމުގައިވާ ކާނާއާއި އަންނައުނު ލިބިފައެވެ.