މޯލްޑިވްސް އިސްލާމިކް ބޭންކުގެ ހިއްސާ ގަނެ އެބޭންކުގެ ހިއްސާދާރަކަށް ވުމުގެ ފުރުސަތު މިއަދު ހަމަވާނެއެވެ.
މިދިޔަ ބުދަ ދުވަހަށް ހިއްސާ ވިއްކުން ނިންމުމަށް އެމްއައިބީން ކުރިން ނިންމި ނަމަވެސް މުއްދަތު އިތުރުކުރީ ސަބްސްކްރިޕްޝަން އަށް ހުޅުވާލާ މުއްދަތަކީ 35 ރަސްމީ ދުވަސް ކަމަށް ކަނޑައަޅާފައިވާ އިރު، އެ މުއްދަތުގައި ރަސްމީ ބަންދު ދުވަހުގެ ގޮތުގައި ދެ ދުވަސް އައުމުން ކަމަށް ބުންޏެވެ.
އެމްއައިބީގެ ހިއްސާދާރަކަށް ވުމަށް ބޭނުންފުޅުވާ ފަރާތްތަކުން އެންމެ މަދުން ގަނެވޭނީ 20 ހިއްސާ އެވެ. އެ އަދަދުގެ ހިއްސާ ގަތުމަށް ހޭދަވާނީ 700 ރުފިޔާ އެވެ. ހިއްސާގެ އަދަދު 20 އަށް ވުރެ އިތުރު ކުރެވޭނީ ފަހަރަކު 10 ހިއްސާގެ މަގުންނެވެ.
އެމްއައިބީން ހިއްސާ ވިއްކުމަށް ހުޅުވާލުމުން ގިނަ ބައެއްގެ ތަރުހީބު އަންނަނީ ލިބެމުންނެވެ.