އެމްޑީޕީން މާލެ އަކީ މާލޭގެ ރައްޔިތުންނަށް އަމާން ރައްކާތެރިތަނަކަށް ހަދައި ދޭން ޖެހޭކަމަށް ހެންވޭރު ދެކުނު ދާއިރާގެ މެމްބަރު ހުސެއިން ޝަހީމް ވިދާޅުވެއްޖެއެވެ.
ހުކުރު ދުވަހުގެ ރޭ މާލޭގައި ހިނގި ނުރައްކާތެރި އަލިފާނުގެ ހާދިސާ އާއި ގުޅިގެން ކާށިދޫ ދާއިރާގެ މެމްބަރު މަޖްލިސްއަށް ހުށަހެޅުއްވި ކުއްލި މައްސަލައަށް ބަހުސް ކުރައްވަމުން ހުސެއިން ވިދާޅުވީ ކޮންމެ އިންތިހާބެއްގައި މާލޭގެ ރައްޔިތުން އެމްޑީޕީއަށް ވޯޓުދީ އިންތިހާބުކޮށްދޭ ކަމަށާއި އެސަބަބަށްޓަކައި އެމްޑީޕީން މާލެ އަކީ މާލެ ރައްޔިތުންނަށް އަމާން ތަނަކަށް ހަދައިދޭންް ޖެހޭ ކަމަށެވެ.
"މާލެއިން އެމްޑީޕީއަކަށް ގޮނޑިއެކޭ ބުނެފިއްޔާ އަބަދުވެސް 100 ޕަސެންޓު ދޭ، އިންތިހާބެއް ވެއްޖިޔާ އަބަދުވެސް މާލޭގެ ހުރިހާ ދާއިރާއަކުން އަތުކުރި އޮޅާލާ ކަކުލާ ހަމައަށް އަރުވާ ޖަހާލާ އެމްޑީޕީގެ ކެންޑިޑޭޓުން ލައި ދެއްވާ، މި ޕާޓީން އެބަޖެހޭ ތެދުވެ މާލެ ހަމައަކަށް އަޅުވަން، މާލެ ރައްކާތެރިތަނަކަށް ހަދަން"
ހުސެއިން ވިދާޅުވީ މާލޭގައި ކަމެއް ހިނގާއިރު 400 އެއްހާ ރައްޔިތުން ހާލުގައި ޖެހޭއިރު އެ މަންޒަރު ބަލާކަށް އެމްޑީޕީން ތިބެވެން ނެތްކަމަށެވެ.
އަދި މާލެ އަކީ އިންސާނުން ދިރުއުޅެން އެކަށީގެންވާ ތަނަކަށް ހަދަން ޖެހޭ ކަމަށެވެ.
"މި ސަރުކާރުން ޓެކްސް ނެގިއަސް އެހެން ތަނަކުން ފައިސާ ނެގިއަސް ބުރިޖް ނޭޅިއަސް މާލެ އެބަޖެހޭ އިންސާނުން އަމާން ކަމާއި އެކު ދިރިއުޅެވޭނެ ތަނަކަށް ހަދަން"
ހުސެއިން ވިދާޅުވީ އެޖެންޑާ 19 ގައި މާލެއިން ބިންދޫކުރާ ގޮތް އޮތީ ލިޔެފައި ކަމަށާއި އެކަން ތަންފީޒު ކުރަން އަވަސް ކުރަން ޖެހޭ ކަމަށެވެ.