ރައީސް ޔާމީންގެ ސަރުކާރުން ޓެރަރިސްޓުންގެ ލިސްޓު އާއްމު ނުކުރީ އޭގެ ސަބަބުން ރާއްޖެއަށް ގެއްލުން. ވެދާނެތީކަމަށް ކުރީގެ ޑިފެންސް މިނިސްޓަރ އަދި ރައްޔިތުންގެ މަޖިލީހުގެ މަޑުއްވަރީ ދާއިރާގެ މެމްބަރު އާދަމް ޝަރީފު އުމަރު ވިދާޅުވެއްޖެއެވެ.
ޓެރަރެރިޒަމްގެ ގާނޫނަށް ހެންވޭރު ދެކުނު ދާއިރާގެ މެމްބަރު ހުސެއިން ޝަހީމް ހުށަހެޅުއްވި އިސްލާހަށް ބަހުސް ކުރައްވަމުން އާދަމް ޝަރީފް ވިދާޅުވީ ކުރީ ސަރުކާރުން ޓެރަރިސްޓުންގެ ލިސްޓު އާއްމު ނުކުރީ އޭގެ ސަބަބުން ރާއްޖެއަށް ލިބޭނެ ފައިދާއަށްވުރެ ނުރައްކާ ބޮޑުކަމުން ކަމަށެވެ.
ޝަރީފު ވިދާޅުވީ އޭރު އެކަމާއި ގުޅިގެން ސަލާމަތީ ބާރުތަކާއި މަޝްވަރާކޮށް ނިންމީ އެފަދަ ލިސްޓެއް އާއްމުކޮށްފިނަމަ ރާއްޖެއަށް ނުރައްކާވެދާނެ ކަމަށެވެ.
"ޓެރަރިސްޓް ޖަމާއަތުގެ ލިސްޓެއް އާންމު ކުރުމަށް ހުށައެޅުނު ނަމަވެސް އެކަމާއި ގުޅިގެން ސަލާމަތީ ޚިދުމަތް ތަކުން ހައްސާސް މައްސަލަތަކެއް ފާހަގަ ކޮށް އެލިސްޓް އާންމު ކޮށްފި ކަމަށްވާނަމަ އޭގެ ސަބަބުން ވާ ފައިދާއަށް ވުރެ ލިބޭނެ ގެއްލުން ބޮޑުވާނެކަމަށް ނިކުމެދާނެކަމަށް އޭރު އެތަނުގައި ތިއްބެވި ބޭފުޅުން ވިދާޅުވި"
ޝަރީފު ވިދާޅުވިއެވެ.
ޝަރީފު ވިދާޅުވީ 2015 ވަނަ އަހަރު ހުށަހެޅު ޓެރަރިޒަމާއި ބެހޭ ގާނޫނުގައި ޓެރަރިސްޓު ޖަމާއަތްތަކުގެ ނަން ހާމަ ކުރުމަށް އޮތް ނަމަވެސް އެކަން އިސްލާހުކޮށް ނިންމީ ލިސްޓު ސިއްރުކޮށްގެން ކަމާއި ގުޅޭ ފަރާތްތަކުން ކުރިއަށް ގެންދިއުމަށެވެ.
ޓެރަރިޒަމާއި ގުޅޭ ބިލަށް ބޮޑެތި އިސްލާހުތަކެއް ހުށަހެޅިފައިވާ އިރު ރައީސް އިބްރާހިމް މުހައްމަދު ސޯލިހު ވަނީ ރާއްޖޭގައި ހަރަކާތްތެރިވާ ޓެރަރިސްޓު ޖަމާއަތްތަކުގެ ލިސްޓު ހާމަކޮށްފައެވެ. އެ ލިސްޓުގައި 17 ޖަމާއަތެއްގެ ނަން ވަނީ ހިމެނިފައެވެ.