ކުރީގެ ރައީސް މައުމޫނާ ދެކޮޅަށް ފުލުސް އޮފީހަށް ކާށިދޫ ދާއިރާގެ މެމްބަރު އަބްދުﷲ ޖާބިރު ހުށައެޅުއްވި ދަރަނީގެ މައްސަލާގައި އެމަނިކުފާނު ހާޒިރުނުކުރާނަމަ ތަހުގީގަށް އެއްބާރުލުން ނުދެއްވަން ޖާބިރު ނިންމަވައިފިއެވެ.
ރޭ ފުލުހަށް މެމްބަރު ޖާބިރު ހާޒިރުކުރުމުން، އެއްވެސް މައުލޫމާތެއް ދެއްވާނީ މައުމޫން ވެސް ހާޒިރުކުރުމުން ކަމަށް ވިދާޅުވެ ތަހުގީގަށް އެއްބާރުލުން ނުދެއްވައި ޖާބިރު ނިކުމެވަޑައިގެންނެވިއެވެ. "މިހާރު" ނޫހަށް މައުލޫމާތު ދެއްވަމުން ޖާބިރު ވަނީ މައުމޫން ނުގެނެސް ތަހުގީގު ކުރިއަށް ގެންދަވާނަމަ އެއްބާރުލުން ނުދެއްވާނެ ކަމަށް ތަކުރާރުވެސް ކޮށްފައެވެ.
މައުމޫންގެ ފަރާތުން އެކި ފަހަރު މަތިން ޖާބިރުގެ ތުހުމަތުތައް ދޮގުކޮށްފައިވާއިރު ޖާބިރު ވަނީ ފުލުހަށް ހެކިވެސް ހުށައަޅާފައިވާނެ ކަމަށް ވިދާޅުވެފައެވެ. ހުށައެޅި ހެއްކެއްގެ ތަފްސީލު ނުދެއްވި ނަމަވެސް ޖާބިރު ވަނީ އެމަނިކުފާނު އަތުން މައުމޫން އަނބުރާ ދައްކަވާ ގޮތަށް ނެންގެވި ކަމަށް ބުނާ 29 މިލިއަން ރުފިޔާ ދިނީ މައުމޫންގެ މއ. ކިނބިގަސްދޮށުގެ މޯގޭޖު ކުރުމަށް ފަހުގައެވެ.
ޖާބިރު ވަނީ ދައްކަން ޖެހޭ ފައިސާ، އިންޓްރެސްޓާ އެކު ނުދައްކައިފިނަމަ ކިނބިގަސްދޮށުގެ އާ ހަވާލުވާނެ ކަމަށް ވެސް މީގެ ކުރީން ވިދާޅުވެފައެވެ.