ސ. ހިތަދޫ ރީޖަނަލް ހޮސްޕިޓަލުގައި މި މަހުގެ ހަތް ވަނަ ދުވަހުން ފެށިގެން ޑައިލިސިސްގެ ހިދުމަތް ދޭން ފެށުމަށް ތައްޔާރުވަމުން އަންނަ ކަމަށް އެ ހޮސްޕިޓަލުން ބުނެފި އެވެ.
ހޮސްޕިޓަލް ހިންގެވުމާ ދާދި ފަހުން ހަވާލުވެވަޑައިގަތް ހަދީޖާ ހަފުސާ ވިދާޅުވީ ޑައިލިސިސް ހިދުމަތް ދޭން ތައްޔާރު ކުރި އިމާރާތުގެ މަސައްކަތް އެއްކޮށް ނިމި، ޑައިލިސިސް ހިދުމަތް ދޭން ގެނައި ދެ މެޝިން ވެސް މިހާރު އިސްޓޯލްކޮށްފައިވާ ކަމަށެވެ.
"އެހެން ނަމަވެސް ހިދުމަތް ދޭން ފަށާ އިރު ބޭނުންވާ ބައެއް ކެމިކަލް ކަހަލަ ވަސީލަތްތައް މިކޮޅަށް ގެނައުމުގެ މަސައްކަތް މިހާރު ކުރަމުން އަންނަނީ. އެތަކެތި މިހާރު މާލޭން ބޯޓަށް ވެސް ލައިފި،" އޭނާ ވިދާޅުވި އެވެ. "އެހެންވެ އުންމީދު ކުރެވެނީ މި މަހުގެ ހަތެއް ހިސާބުގައި ހިދުމަތް ދޭން ފެށޭނެ ކަމަށް."
ހޮސްޕިޓަލްގައި ޑައިލިސިސްގެ ހިދުމަތް ދެނީ އަމިއްލަ ފަރާތަކުން ހަދިޔާ ކުރި މެޝިންތަަކަކާ އެކުގަ އެވެ. އެގޮތުން މިހާރު ބެހެއްޓި ދެ މެޝިނުން ދުވާލަކު ހަ މީހަކަށް ފަރުވާ ދެވޭނެ ކަމަށް ހަފުސާ ވިދާޅުވި އެވެ.
"ކުރިއަށް އޮތް ތަނުގައި މެޝިން އަދި އިތުރު ވެސް ކުރެވޭނެ. މިހާރު ވެސް އަމިއްލަ ކުންފުންޏަކުން ޝައުގުވެރިކަން ފާޅުކޮށްފައި އެބަ އޮތް އިތުރު މެޝިންތަކެއް ގެނެސް ދިނުމަށް،" އޭނާ ވިދާޅުވި އެވެ.
ކިޑްނީ ބައްޔަށް ފަރުވާ ހޯދާ މީހުންނަށް ދޭ ޑައިލިިސިސްގެ ހިދުމަތް ހިތަދޫ ހޮސްޕިޓަލުން ދޭން ފަށާ އިރު، ފަރުވާ ހޯދާ އެއްވެސް މީހަކު މިވަގުތު ރަށުގައި ނެތް ކަމަށް ހޮސްޕިޓަލުން ބުންޏެވެ.
"މިކޮޅުން ފަރުވާ ނުލިބޭތީ އެއްވެސް މީހަކު މިވަގުތު ރަށަަކު ނެތް. އެކަމަކު ހިދުމަތް ދޭން ފެށުމުން ހިދުމަތް ރަށުން ހޯދަން ބޭނުންވާ ހަތަރު ބަޔަކު މިހާރު ވެސް އަޅުގަނޑުމެންނަށް ގުޅަމުން ގެންދޭ މިކޮޅުން ހިދުމަތް ދެވެން ފެށޭނެ ދުވަހެއް ބަލަން،" ހަފުސާ ވިދާޅުވި އެެވެ.