އަންގާރަ ދުވަހުގެ ރޭ އދ. ގެ ޖެނެރަލް އެސެމްބްލީގައި ދިވެހި ގައުމު ތަމްސީލް ކުރައްވައި ރައީސުލް ޖުމުހޫރިއްޔާ އިބްރާހިމް މުހައްމަދު ސޯލިހް ދެއްވި ތަގުރީރު ވަރަށް ފުރިހަމަ ކަމަށާއި އެތަގުރީރު ބަލާލެވުނީ އުފަލުން ކަމަށް ރާއްޖޭގެ ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
ދުވަސްވީ ދެމިތުރުންގެ މެދުގައި ނުތަނަވަސްކަމެއް އުފެދިފައިވާ ކަމަށް މީޑިޔާގައި ދެކެވޭ ވާހަކަތައް ދެބޭފުޅުން ވެސް ދޮގުކޮށްފައިވަނިކޮށް ރައީސް ސޯލިހްގެ ތަގުރީރާ ގުޅޭގޮތުން "މިހާރު" ނޫހަށް ދެއްވި އިންޓަވިއުއެއްގައި ނަޝީދު ވިދާޅުވީ އެތަގުރީރަކީ ވަރަށް މޮޅު، ފުރިހަމަ ތަގުރީރެއް ކަމަށެވެ. "ކޮންޓެންޓް ވެސް އަދި ޑެލިވަރީ ވެސް. އަމިއްލަ ގޮތުން ދަންނަވާނީ ރައީސް އިބްރާހިމް މުހައްމަދު ސޯލިހު އދ. ގެ އާންމު މަޖިލިހުގައި ތަގްރީރު ކުރައްވާތަން ފެނުމަކީ ލިބުނު ވަރަށް ބޮޑު ފަހުރުވެރި ކަމެކޭ،" ނަޝީދު ވިދާޅުވިއެވެ.
މޫސުމަށް އަންނަ ބަދަލުތަކާއި ގުޅޭގޮތުން ރައީސް ސޯލިހް ދިގުކޮށް ވާހަކަ ދެއްކެވިއިރު ދިވެހި ރާއްޖެ ބޭރު ދުނިޔެއާއި ވަކިވެފައި އޮތް އޮތުން ނިމުމަކަށް އައިސްފައިވާކަން ވެސް ރައީސް، ލީޑަރުންގެ ކުރިފުޅުމަތީގައި ފާހަގަކުރެއްވިއެވެ. އަދި ފަލަސްތީނުގެ ރައްޔިތުންނާ މެދު އިޒުރޭލުން ކަންތައް ކުރާ ގޮތާ މެދު ކަންބޮޑުވުން ފާޅުކޮށް، ދިވެހިން ތިބޭނީ ފަލަސްތީނު ރައްޔިތުންނާ އެކުގައި ކަމަށް ވެސް ރައީސް ވިދާޅުވިއެވެ.
އދ. ގައި 7 އަހަރު ފަހުން ދިވެހި ރާއްޖޭގެ އެންމެ މަތީ ވެރިޔަކު ވާހަކަ ދައްކަވާފައިވާއިރު ރައީސް ސޯލިހުގެ ތަގުރީރަށް ބޮޑު ތަރުހީބެއް ލިބިގެން ދިޔައެވެ. ރައީސް ވާހަކަ ދެއްކެވީ މިފަހަރު ހަވަނައަށެވެ. މިއީ އދ. ގެ އާންމު ޖަލްސާއެއްގައި މިހާ ކުރީކޮޅު ރާއްޖޭގެ ވެރިޔަކު ވާހަކަ ދެއްކެވި ފުރަތަމަ ފަހަރެވެ.