އައްޑޫ މީދޫ ޝަމްސުއްދީން ސްކޫލް ބަންދުކޮށް އެ ސްކޫލްގައި ކިޔަވާ ދަރިވަރުން ސ. އަތޮޅު މަދަރަސާއަށް ބަދަލު ކުރުމަށް އެޑިއުކޭޝަންއިން ނިންމުމާއި ގުޅިގެން ރައްޔިތުން ކަންބޮޑުވުން ފާޅުކުރަން ފަށައިފިއެވެ.
މީދޫން ވާހަކަ ދެއްކި މީހަކު ބުނީ ޝަމްސުއްދީން ސްކޫލް ބަންދު ކުރުމަކީ ރަށުގެ ރައްޔިތުން ބޭނުންވާ ކަމެއް ނޫންކަން ދެއްކުމަށް އިއްޔެ އާއްމު ރައްޔިތުން ޝުއޫރު ފާޅުކޮށް ޕޯސްޓަރާއި އެކު ސުލްހަވެރި އެއްވުމެއް ބާއްވާފައިވާކަމަށެވެ.
210 ދަރިވަރުން ކިޔަވަމުން އަންނަ ޝަމްސުއްދީން ސްކޫލަކީ ޕްރީ ސްކޫލުން ފެށިގެން ގްރޭޑް 6 އާއި ހަމައަށް ކިޔަވައިދޭ ސްކޫލެކެވެ.
މައުލޫމާތު ލިބިފައިވާ ގޮތުގައި ޝަމްސުއްދީން ސްކޫލްގެ ޕްރިންސިޕަލް ސުލްޠާން ރާމިޒު މިހާރު ވަނީ ހިތަދޫ ނޫރާނީ ސްކޫލަށް ބަދަލުކޮށްފައެވެ. ނޫރާނީ ސްކޫލަކީ ރައީސް ޔާމީންގެ ސަރުކާރުގައި 22 މިލިއަނަށް ވުރެ ބޮޑު ހޭދައެއްކޮށްގެން އިމާރާތްކޮށްފައިވާ 60 ދަރިވަރުން ކިޔަވަމުން އަންނަ ސްކޫލެކެވެ.
މީދޫން ކަންބޮޑުވުން ފާޅުކުރި ބައެއް ރައްޔިތުން ބުނީ ޝަމްސުއްދީން ސްކޫލަކީ 75 އަހަރަށްވުރެ ދިގު މުއްދަތަކަށް މީދޫގެ ތައުލީމު އުނގަންނައިދިން މަދަރަސާއެއް ކަމަށާއި އެތަން ބަންދު ކުރުމަށް ސަރުކާރުން ދައްކާ ވާހަކަ ދެކޮޅު ނުޖެހޭ ކަމަށެވެ.
މައުލޫމާތު ލިބިފައިވާ ގޮތުގައި އެޑިއުކޭޝަނުން ވަނީ އައްޑޫގެ ބައެއް ސްކޫލްތައް އުވާލުމަށް ނިންމާފައެވެ. އެގޮތުން އަންނަ އަހަރު ޝަމްސުއްދީން ސްކޫލާއި ހުލުދޫ ސްކޫލް އުވާލައި ސ. އަތޮޅު މަދަރަސާއަށް ކުދިން ބަދަލު ކުރުމަށްވަނީ ނިންމާފައެވެ.
އަދި 2022 ވަނަ އަހަރު މަރަދޫފޭދޫ ސްކޫލާއި މަރަދޫ ސްކޫލް އުވާލައި އިރުޝާދިއްޔާ ސްކޫލަށް ކުދިން ބަދަލު ކުރުމަށް ދަނީ މަޝްވަރާ ކުރަމުންވެ.