އައްޑޫގެ ފަތުރުވެރިކަން އިތުރަށް މުއްސަނދި ކުރުމަށް ސަރުކާރާއި ކައުންސިލާ ދެމެދު 4،000 އެނދު ތަރައްގީ ކުރުމުގެ އެއްބަސްވުމެއް ހެދިފައިވާއިރު، ގެސްޓް ހައުސް އެޅުމަށް ބިން ދޫކުރާއިރު އައްޑޫ ރައްޔިތުންނަށް އިސްކަން ނުދޭނެ ކަމަށް މޭޔަރ އަބްދުﷲ ސޯދިގު ވިދާޅުވެއްޖެއެވެ.
މިއަދު ވެވުނު އެއްބަސްވުމާއެކު ދެކުނުގެ ރައްޔިތުންނަށް އުއްމީދު އާވެފައިވާ ކަމަށް ސޯބެ ވިދާޅުވެފައިވާއިރު މި ސަރަހައްދުތައް ތަރައްގީ ކުރެވޭނެ ގޮތުގެ ކޮންސެޕްޓެއް އެކުލަވާލެވި އަދި ލޭންޑްސްކޭޕް ކުރުމުގެ މަޝްވަރާ ގުޅިގެން ކުރުމުގެ މަސައްކަތް ފަށާފައިވާ ކަމަށް އޭނާ ވިދާޅުވިއެވެ.
ސޯބެ ވިދާޅުވީ 4،000 އެނދު ތަރައްގީ ކުރާނީ ގެސްޓު ހައުސް އަދި ސިޓީ ހޮޓާ އެޅުމަށް ކަމަށާއި މިއެނދު ތަރައްގީ ކުރާއިރު ބިން ދޫކުރަން އިސްކަން ދެވޭނީ އިންވެސްޓަރުންނަށް ކަމަށް ވެސް ވިދާޅުވިއެވެ. އަދި ޝައުގުވެރިވާ ފަރާތްތަކަށް އޮކްޓޯބަރު މަހުން ފެށިގެން ބިން ދޫކުރަން ފެށޭނެ ކަމަށް ކައުންސިލުން ބުނެފައިވެއެވެ.
ޓޫރިޒަމް ކުރިއެރުވުމަށް 4،000 އެނދު ތަރައްގީ ކުރަން ނިންމީ އައްޑޫގެ ރައްޔިތުންނާ މަޝްވަރާ ކުރުމަށް ފަހު ކަމަށް މިއަދު ބޭއްވި ނޫސްވެރިންގެ ބައްދަލުވުމުގައި މޭޔަރ ވިދާޅުވި ނަމަވެސް މިކަމާ ގުޅިގެން ރައްޔިތުންނަށް ހުޅުވާލައި ބޭއްވި ބައްދަލުވުމުގައި ސުވާލުކުރުމުގެ ފުރުސަތެއް ދީފައެއް ނުވެއެވެ.