ނިއުޕޯޓްވިއު ބިމަކީ ބިޑު އުސޫލުން ކުއްޔަށް، ދައުލަތުން ޚަރަދެއް ނުކޮށް ނަމަވެސް ސީއެސްއާރު ގޮތުގައި ދައުލަތަށް ގިނަ ކަންތައްތަކެއް ހިންގޭ ގޮތަށް ދޫކުރެވުނު ބިމެއް ކަމަށް ކުރީގެ ހައުސިން މިނިސްޓަރ މުހައްމަދު މުއިއްޒު ވިދާޅުވެއްޖެއެވެ.
ނިއުޕޯޓް މައްސަލާގައި ދައުލަތާ އެއްކޮޅަށް ކޯޓުން ހުކުމްކޮށް ހަފްތާއެއް ތެރޭ ބިން ހަވާލުކުރުމަށާއި އެއް މިލިއަން ރުފިޔާ ދައުލަތަށް ދިނުމަށް މައްސަލަ ނިންމާފައިވާއިރު މިހާރު އެމައްސަލަ ހައި ކޯޓުގައި އިސްތިއުނާފު ކުރުމަށް ވަނީ ނިންމާފައެވެ.
ނިއުޕޯޓް މައްސަލަ ނިމުނު ގޮތާމެދު އިދިކޮޅު ފަރާތްތަކުން ފާޑުކިޔާފައިވާއިރު އޭރުގެ ހައުސިން މިނިސްޓަރ މުއިއްޒު ވަނީ އެބިން ނިއުޕޯޓަށް ދިން ގޮތާއި ޗާޓައިމް ނެގުނު ގޮތުގެ ތަފްސީލު ކިޔާދީފައެވެ. މުއިއްޒު ވިދާޅުވީ، ޗާޓައިމް ދައުލަތަށް ނެގީ، ރިންގް ރޯޑް މަޝްރޫއަށް ކޮންމެހެން ނަގަން ޖެހިގެން އުސޫލުތަކުގެ މަތިން ބަދަލުދޭން ވެސް ނިންމުމާ ގުޅިގެން ކަމަށެވެ.
ނިއުޕޯޓް ހިންގާ ސްޓްރާޑާ ޕްރައިވެޓް ލިމިޓެޑުން ނެރުނު ބަޔާނެއްގައި ބުނީ އެ ކުންފުންޏަށް ސަރުކާރުން ދޫކުރި ބިމުގައި ސީއެސްއާރުގެ ދަށުން އާންމުންނަށް ތިބެވޭނެ ގޮތަށް ބްރިޖް ބަލާލެވޭނެ ޕްލެޓްފޯމަކާއި ފުޓްސަލް ދަނޑަކާއި، ކުޑަކުދިން ކުޅޭނެ އިންޑޯ ޕްލޭ އޭރިއާއެއް ތަރައްގީ ކުރި ކަމަށެވެ.
އަދި އެ މަސައްކަތަށް ކުންފުނިން ކުރި އިންވެސްޓްމަންޓް ކަވަރު ކުރުމަށްޓަކައި މި ކުންފުނިން ކުރި އިންވެސްޓްމަންޓް ކަވަރު ކުރުމަށްޓަކައި "ނިއު ޕޯޓް" ވިއުގެ ނަމުގައި ރެސްޓޯރަންޓަކާއި ބައިނަލްއަގްވާމީ ފްރެންޗައިޒް ބްރޭންޑް "ޗާޓައިމް" ހުޅުވި ކަމަށާއި ނަމަވެސް އެތަން ހުޅުވިތާ ހަ މަސް ނުވަނީސް ބޮޑުތަކުރުފާނު މަގު ތަރިންގް ރޯޑު ތަރައްގީ ކުރަން "ޗާޓައިމް" ހިންގި ސަރަހައްދު ދައުލަތަށް ނަގަން ބޭނުުންވާ ކަމަށް އަންގައި އެ ތަން ތަޅާލި ކަމަށް ބަޔާނުގައިވެ އެވެ.