ރައްޔިތުންގެ މަޖިލީހުން ޓެރަރިޒަމްގެ ގާނޫނަށް ސަރުކާރުން ހުށައެޅި އިސްލާހު، ފުލުހުންނަށް ބޮޑެތި ބާރުތަކެއް ދިނުމަށް ފަހު މިއަދު ފާސްކޮށްފިއެވެ.
އޭގެ ތެރޭގައި ކޯޓު އަމުރެއް ނެތި ހައްޔަރުކުރުމާއި ބަލާ ފާސްކުރުމުގެ ބާރު ވަނީ މިއިސްލާހުގެ ދަށުން ފުލުހުންނަށް ދީފައެވެ. ސަރުކާރުން ހުށައެޅީ 48 ގަޑިއިރު ވަންދެން ޓެރަރިޒަމްގެ ކުށުގައި ހައްޔަރުކުރެވޭ މީހަކު ބަންދުގައި ބެހެއްޓުމަށެވެ. ނަމަވެސް ކޮމިޓީން ވަނީ އެމުއްދަތު 24 ގަޑިއިރަށް ބަދަލުކުރުމަށް ފާސްކޮށްފައެވެ.
ޓެރަރިޒަމް ކަމަށް ބިލްގައި ބުނެފައި ވަނީ ވަކި ސިޔާސީ ނުވަތަ ދީނީ ނުވަތަ ހައްދުފަހަނައަޅާފައިވާ ވަކި ފިކުރެއް ކުރިއެރުވުމަށް ކުރާ ކަންކަމާއި ސަރުކާރުން ވަކިކަމެއް ކުރުމަށް ނުވަތަ ނުކޮށް ދޫކޮށްލުމަށް މަޖުބޫރު ކުރުވުމަށް ނުވަތަ އާންމުންގެ ބައެއްގެ މެދުގައި ބިރުވެރިކަން އުފެއްދުމަށެވެ.
ޓެރަރިޒަމްގެ ގާނޫނަކީ ސިޔާސީ ބޭނުމަށް ބޭނުންނުކުރެވޭނެ ގާނޫނަކަށް ހެދުމަށް ބިލްގައި ޓެރަރިޒަމްގެ ކުށްތައް ވަނީ ތަފްސީލުކޮށްފައެވެ. 7 އަމަލެއް ކުށެއްގެ ގޮތުގައި ބަޔާންކޮށްފައިވާއިރު އޭގެ ތެރޭގައި މީހެއްގެ ހަށިގަނޑަށް ބޮޑު އަނިޔާއެއް ދިނުން، ކުށްކުރާ މީހާ ފިޔަވައި އެހެން މީހެއްގެ ފުރާނައަށް ނުރައްކަލެއް ދިނުން، ގަދަކަމުން މީހަކު ފޮރުވުން ނުވަތަ ރަހީނުކުރުން، މުދަލަށް ބޮޑެތި ގެއްލުން ދިނުން، ފަސިންޖަރުން ނުވަތަ މުދާ އުފުލާ އުޅަނދެއް ގަދަބާރުން ހައިޖެކް ކުރުން، ބައެއްގެ ސަލާމަތަށް ބޮޑު ނުރައްކަލެއް ވާ ހާލަތެއް ކުރިމަތިކުރުވުން އަދި އުމްރާނީ ވަސީލަތަކަށް ގެއްލުން ދިނުން ނުވަތަ އަސާސީ ހިދުމަތެއް މެދުކަނޑާލުމެވެ.
މީގެ އިތުރުން ރައީސުލް ޖުމުހޫރިއްޔާ ކަނޑައަޅުއްވާފައިވާ ޓެރަރިސްޓު ޖަމާއަތަކަށް މީހުން ފޮނުވުން، ނުވަތަ ފޮނުވުމަށް އެހީތެރިވުން/ހިތްވަރު ދިނުން އަދި ހަނގުރާމައެއްގައި ބައިވެރިވުމަށް ބޭރަށް ދިއުން ވެސް ވަނީ ކުށެއްގެ ގޮތުގައި ލިޔެވިފައެވެ. އަދި އެފަދަ ޖަމާއަތަކާ އެއްކޮޅަށް ވާހަކަ ދެއްކުމާއި ވަކާލާތު ކުރުމަކީވެސް އަދަބު ކަނޑައެޅިފައިވާ ކުށްތަކެވެ.
މިފަދަ ކުށެއް ކުރި ކަމަށް ތުހުމަތު ކުރެވޭ މީހަކު ހައްޔަރުކުރުމާއި ބަލާ ފާސްކުރުމަށް ކޯޓު އަމުރެއް ބޭނުން ނުވާ ގޮތަށް ހަދާފައިވާއިރު ކުށެއް ސާބިތުވެއްޖެނަމަ ބޮޑު ޖަލު ހުކުމެއް އަންނާނެއެވެ.
ސަރުކާރުން ހުށައެޅި މިބިލް ފާސްވެފައިވަނީ މަޖިލީހުގެ ޖަލްސާގައި ހާޒިރުވެތިބި މެމްބަރުންގެ ތެރެއިން 52 މެމްބަރުންގެ ވޯޓާއެކުގައެވެ.