މިހާރު އެންމެ އާއްމުކޮށް ދެކެވޭ ވާހަކައަކީ ބަރަހަނާގެ ވާހަކަ އެވެ. ސްޕްރީމް ކޯޓްގެ ފަނޑިޔާރަކުގެ ބަރަހަނާ ވީޑިއޯއެއް އާއްމުވުމުން ގިނަ ބަޔަކަށް އެކަން ވަރަށް މަޖާ ކަމަކަށް ވިއެވެ.
އަނެއް ބަޔަކަށް އެކަންވީ ވަރަށް ސީރިއަސް މައްސަލައަކަށެވެ. ކޮންމެއަކަސް ފަނޑިޔާރަކަށް ވިޔަސް އެބޭފުޅެއްގެ ބަރަހަނާ ވީޑިއޯއެއް ލީކުވުމުން އެ މައްސަލަ ވަރަށް ރަގަޅަށް ތަހުޤީޤު ކުރަންވާނެ އެވެ. ނަމަވެސް ސަރުކާރުން މި ކަމަށް މާ ބޮޑު ސަމާލުކަމެއް ދޭތަނެއް ނުފެނެ އެވެ.
ސޯޝަލް ބައެއް މީޑިއާތަކުގައި ސްޕްރީމް ކޯޓުގެ ފަނޑިޔާރު އަންހެނަކާ އެކު ކޮޓަރިއެއްގެ ތެރޭގައި އެނދު މަތީގައި ތިއްބާ ނަގާފައިވާ ފޮޓޯއެއް ލީކް ވެފައިވާ އިރު، ބްލެކް މެއިލް ކުރެވެމުން ދާ ފަނޑިޔާރަކީ ކޮން ބޭފުޅެއް ކަމަށް ސީދާ ރަސްމީ އެއްވެސް ފަރާތަތްކުން ހާމައެއް ނުކުރެ އެވެ. މިކަމުގެ އަޑީގައި ރައްޔިތުންގެ މަޖިލީހުގެ މެމްބަރެއްގެ އަތެއްވާ ކަމަށް ވެސް މިހާރު ދަނީ ބުނަމުންނެވެ.
ހައުސިން މިނިސްޓްރީގެ އެޑްވައިޒަރު ކަމުގެ މަޤާމުގައި ހުރި ސ. ފޭދޫ އަށް ނިސްބަތްވާ އަހްމަދު ފާއިޒު ބަރަހަނާ ވީޑިއޯއެއް ބޭނުން ކޮށްގެން ސްޕްރީމް ކޯޓްގެ ފަނޑިޔާރަކު ބްލެކް މެއިލް ކުރަން އުޅުނު ކަމުގައި މިހާރުވަނީ ހައްޔަރުކޮށް ބަންދު ވެސް ކޮށްފަ އެވެ.
ރައީސް ޑރ. މުހައްމަދު ވަހީދުގެ ވަރަށް ޤާތް ބޭފުޅަކަށް އަބަދުވެސް ހުންނަވާ އަހްމަދު ފާއިޒު މިފަދަ އަމަލެއް ކުރުމުން ގިނަ ބަޔަކު ދަނީ މިއީ ސީދާ ވަހީދުގެ އެދުމުގެ މަތިންކޮށްފައިވާ އަމަލެއް ކަމަށް ބުނަމުންނެވެ.
މީގެ އިތުރުން ފާއިޒު މިކަން ކުރުމުގެ ބޭނުމަކީ ވަހީދުގެ ރަނިންމޭޓް އަހްމަދު ތަސްމީން އަލީ އާ ދެކޮޅަށް ތިމަރަފުށީ މުސްތަފާ ސްޕްރީމް ކޯޓަށް ހުށަހެޅި މައްސަލައިގެ ނިމުން ތަސްމީން އާއި ވަހީދު ބޭނުންވާ ގޮތަށް ނިންމުން ކަމަށެވެ. އަދި އެ މައްސަލަ ނިމިގެންދާ އިރު، ތަސްމީނުގެ ގޮނޑި ގެއްލިގެން ނުދިއުމަށް ކުރެވޭ ކަމެއްގެ ބާބެއް ކަމަށް ބައެއް ސިޔާސީ ފަރާތްތަކުން ދަނީ ބުނަމުންނެވެ.
ލީކްވެފައިވާ ވީޑިއޯއާއި ގުޅޭ ގޮތުން އިއްޔެ ބޭއްވި ރައްޔިތުންގެ މަޖިލީހަށް މާފަންނު އުތުރު ދާއިރާގެ ޢިއްޒަތްތެރި މެންބަރު އިމްތިޔާޒު ފަހުމީ ވަނީ ކުއްލި މައްސަލަ އެއް ހުށަހަޅައި އެކަމާއި ގުޅޭ ގޮތުން މަޖިލީހުގައި ވަނީ ބަހުސް ވެސް ކޮށްފަ އެވެ.
ބައެއް މެމްބަރުން ވިދާޅުވީ ސުޕްރީމް ކޯޓުގެ ފަނޑިޔާރަކު މިފަދަ ޢަމަލެއްކޮށްފި ނަމަ އެ ބޭފުޅަކު އަމިއްލަ އަށް އިސްތިޢުފާ ދެއްވަން ޖެހޭނެ ކަމަށެވެ.
މީގެ ކުރިން ވެސް ވަނީ ކުރީ ސަރުކާރުގެ ގިނަ ބައެއްގެ ބަރަހަނާ ވީޑިއޯތަކެއް ލީކްކޮށް އެ ވީޑިއޯތައް ބޭނުންކޮށްގެން ބްލެކްމެއިލްކޮށް ގިނަ އަދަދެއްގެ ފައިސާ ވެސް ވަނީ އެ ފަރާތްތަކުން ހޯދައިފަ އެވެ.
އެ ވީޑިއޯތައް ބޭނުންކޮށްގެން ބްލެކްމެއިލް ކުރި ކަމަށް ތުހުމަތު ކުރެވޭ މީހުންނާއި ވީޑިއޯތަކުގައި "ބަރަހަނާވި" ބައެއް މީހުންގެ މައްސަލައިގައި ދައުވާ ކުރުމަށް ވަނީ ޕީޖީ އޮފީހަށް ވެސް ފޮނުވައިފަ އެވެ.